نوێترین لێدوانی ئەسەد لەبارەی کێشەکانی کورد لە سووریا

K24 – هه‌ولێر:

لە چاوپێکەوتنێکی لەگەڵ کەناڵی ئاڕ تی رووسی، بەشار ئەسەد، سەرۆکی سووریا لەبارەی پەیوەندییەکانی لەگەڵ کورد رایگەیاند: "ئێستا سوپاکەی ئێمە زۆر بەهێزتر بووە و بەشکردنی دەسەڵاتی لەگەڵ هەسەدە رەتکردووەتەوە".

راشیگەیاند: "رێککەوتن لەگەڵ هەسەدە لەسەر بنەمای گەڕانەوەی سەروەری تەواوی حکوومەتی سووریایە بە هەموو ناوچە کوردییەکان و دوورخستنەوەی کوردەکان لە سنوورەکان تاوەکو هێرشی تورکیا رابگیرێت".

ئاماژەی بەوەشدا، من داوام لە کوردەکان کردووە ببنەوە بەشێک لە هێزەکانی حکوومەت، ئەمەش هەندێکیان پەسەندیان کردووە و هەندێکی دیکەیان رەتی دەکەنەوە.

ئەسەد دەڵێت: "کێشەی سەرەکی لەگەڵ (پەیەدە)یە کە یەکەیەکی سەربازیی بە ناوی یەپەگە دروست کردووە و پەکەکەش سەر بەوانە".

سەرۆکی سووریا ئاشکرایکردووە: "زۆربەی کوردەکان پەیوەندییەکی باشیان لەگەڵ حکوومەت هەیە و زۆربەیان پشتگیری حكوومەت دەکەن تەنها ئەوانە نەبن کە سەر بە (پەیەدە)ن، ئەوان لە لایەن ئەمەریکییەکانەوە پشتگیرییان لێ دەکرا، لەگەڵ ئەمەریکا پێکەوە نەوت دەدزن و باقاچاغی دەبەن".

ئەوەشی نەشاردووە کە پەیەدە تووڕەیە لە ئەمەریکا بەوەی ئەوانی بەجێهێشتووە لە سوریا.