یەختێکی کۆچبەرانی کورد به‌ 52 كۆچبه‌ره‌وه‌ تێكشكا

ته‌نها یه‌ك په‌نابه‌ر بێسه‌روشوێنه‌

K24 - هه‌ولێر:

یەختێك کە 52 کۆچبەری کوردی هەڵگرتبوو، به‌ر له‌وه‌ی بگه‌نه‌ كه‌ناراوه‌كانی دوورگه‌ی كرۆتۆنێی ئیتاڵیا، تێكشكا و ئێستاش ته‌نها یه‌كێك له‌و په‌نابه‌رانه‌ بێسه‌روشوێنه‌ و چاره‌نووسی نادیاره‌.

ئاری جه‌لال، سه‌رپه‌رشتیاری فیدراسیۆنی په‌نابه‌ران له‌ هه‌رێمی كوردستان رایگه‌یاند، كاتژمێر 4ى به‌ره‌به‌یانی ئه‌مڕۆ، 10ی كانوونی دووه‌م/ یه‌نایه‌ری 2019, یه‌ختێك، كه‌ 52 په‌نابه‌ری كوردی تێدابووه‌، له‌ كه‌ناراوه‌كانی یۆنان به‌ره‌و ئیتاڵیا به‌ڕێكه‌وتووه‌، به‌ڵام به‌ر له‌ گه‌یشتنیان به‌ وشكانی، یه‌خته‌كه‌ تێكشكاوه‌ و سه‌رجه‌م په‌نابه‌ران كه‌وتوونه‌ته‌ ناو ئاوی ده‌ریای ناوه‌ڕاست.

ئاری جه‌لال ئاماژه‌ به‌وه‌ش ده‌كات، دوای ئه‌وه‌ی په‌نابه‌ره‌ كورده‌كان داوای به‌هاناوه‌چوونیان كردووه‌، پۆلیسی ناوچه‌ی تۆڕممیلیسیا، گه‌یشتوونه‌ته‌ شوێنی رووداوه‌كه‌ به‌ به‌له‌می فریاگوزاری و چووپ، زۆربه‌ی په‌نابه‌رانی ناو ئاوه‌كه‌یان رزگاركردووه‌.

سه‌رپه‌رشتیاری فیدراسیۆنی په‌نابه‌ران راشیگەیاند, سه‌ره‌تا تیمه‌ فریاگوزارییه‌كان، 49 په‌نابه‌ریان رزگاركردووه‌، دوای نزیكه‌ی دوو كاتژمێر دایكێك و منداڵێكی ساواش رزگار كران، ئێستاش ته‌نها یه‌ك په‌نابه‌ر بێسه‌روشوێنه‌ و دیار نییه‌.

به‌ گوێره‌ی گوته‌كانی ئاری جه‌لال، دوای رزگارکردنی پەنابەرە كوردە‌كان، لە‌ ھۆتێلێكدا بە‌رامبە‌ر شوێنی رووداوە‌كە‌ گە‌رمكراونە‌وە‌تەوە و خواردنی پێویستیان پێدراوە و ھاوكاری کراون، دواتریش رەوانەی کەمپی سانت ئاناى سەر بە شاری كرۆتۆنێ، کراون.

ئاری جه‌لال رایگەیان نوینەرایەتی دەزگای لووتکە بۆ کاروباری ئاوارە و پەنابەران لەئەوروپا ئاگادارکردووه‌تەوە کەتەواوی هەوڵەکانیان بخەنەگەڕ بەمەبەستی دۆزینەوەی چارەنووسی ئەو پەنابەرەی كه‌ تا ئێستا بێسه‌روشوێنه‌ و نه‌دۆزراوه‌ته‌وه‌.