ئێران خستنە خوارەوەی فڕۆکەیەکی ئەمەریکی راگەیاند
K24 – هه‌ولێر:
ئێران خستنە خوارەوەی فڕۆکەیەکی بێفڕۆکەوانی ئەمەریکای راگەیاند و ئەمەریکاش رەتیدەکاتەوە.
بەگوێرەی هەواڵێکی ئاژانسی ئێرنا، سوپای پاسداران، فڕۆکەیەکی بێ فڕۆکەوانی ئەمەریکی لە جۆری ئار کیو چوار گڵۆباڵ هۆک، لە نزیک شارۆچکەی کوهموبارەک لە پارێزگای هورمۆزگان و لە باشووری ئەو وڵاتە خستووەتە خوارەوە، کە ئەرکی کۆکردنەوەی زانیاری هەواڵگری بووە.
لە بەرامبەردا، بێل ئۆریان، گوتەبێژی فەرماندەیی ناوەندی هێزەکانی ئەمەریکا، رەتیکردەوە هیچ فڕۆکەیەکیان ئاسمانی ئێرانی بەزاندبێت و روونیکردەوە کە هیچ فڕۆکەیەکی ئەمەریکی لەو ناوچانە نەفڕیووە.
زیاد بوونی گرژییەکانی نێوان ئەمەریکا و ئێران بەردەوامە و لە نوێترین پێشهاتیشدا، ئێران دەڵێت، دەستدەکاتەوە بە پیتاندنی یۆرانیۆم و دوورکەوتنەوە لە رێککەوتننامە ئەتۆمییەکە، ئەمەش جیا لە ئەمەریکا، ئەوروپاشی نیگەران کردووە.
CNBC
H.J