وەزارەتی دارایی داوای لیستی مووچەی مانگی 3 دەكات

داوا لە گەنجینەكان كراوە لیستەكە ئامادە بكەن

K24 - ھەولێر

وەزارەتی دارایی و ئابووری حكوومەتی ھەرێمی كوردستان بە فەرمی داوای لە گەنجینەكان كردووە لیستی مووچەی مانگی 3ی ئەمساڵ ئامادە بكەن، ئەگەر پێش جەژن بەغدا بەشە مووچەی ھەرێمی كوردستان رەوانە بكات مووچەی فەرمانبەران دابەش دەكرێت.

سەرچاوەیەك لە وەزارەتی دارایی و ئابووری بە كوردستان24ی راگەیاند: "وەزارەت گەنجینەکانی ئاگادارکردووەتەوە کە لیستی مووچەی مانگی 3ی ئەمساڵ ئامادە بكەن و بینێرن، ئەگەر بەغدا پێش جەژنی رەمەزان بەشە مووچەی فەرمانبەرانی هەرێمی كوردستان بنێرێت، ئەوە دەست بە دابەشکردنی مووچەی فەرمانبەران دەکرێت".

مانگانە وەزارەتی دارایی لە 5ی مانگ دەست بە دابەشكردنی مووچە دەكات، بۆ ئەم مانگەش وادەكە دەكەوێتە سەروبەندی جەژن، ئەگەر پێش ھاتنی جەژن دەست بە دابەشكردنی مووچە نەكرێت، ئەوا لەكاتی خۆی دوا دەكەوێت و فەرمانبەران دوای جەژن مووچە وەردەگرن.

ھ.م