بەڕێوەبەرایەتیی رەگەزنامە ھاووڵاتیان ئاگادار دەكاتەوە

ئەوانەی سەردانی رەگەزنامە دەكەن دەبێ ئەم پێداویستییانەیان پێبێت

K24 - ھەولێر

بەڕێوەبەرایەتیی گشتیی ره‌گه‌زنامه‌ی هه‌رێمی كوردستان لە راگەیەندراوێكدا ھاووڵاتیان ئاگادار دەكاتەوە، كه‌ ئەو ژنانەی شوویان بە پیاوی بیانی كردووە و دەیانەوێت منداڵەكانیان تۆمار بكرێت، پێویسته‌ سه‌ردانی‌ ئه‌و فه‌رمانگه‌یه‌ بكه‌ن، كه‌ دایكه‌كه‌ی تێدا تۆمار كراوه‌ و پێناسی‌ باری‌ شارستانی‌ وه‌رگرتووه‌.

بە گوێرەی راگەیەندراوەكە، ئەو ھاووڵاتیانە دەبێ ئەم پێداویستییانه‌ی‌ لای‌ خواره‌وه‌ی‌ان پێبێت:.

1- پێناسی‌ باری‌ شارستانی‌ و ره‌گه‌زنامه‌ی‌ عێراقیی‌ دایكی‌ مندڵه‌كه.

2- كارتی‌ زانیاری‌ به‌ ناوی‌ دایكه‌كه‌وه‌ بێت.

3- به‌ڵگه‌ی‌ بیانی‌ و كارتی‌ نشینگه‌ی‌ باوكی‌ منداڵه‌كه‌.

4- به‌ڵگه‌ی‌ هاوسه‌رێتی‌ به‌ زمانی‌ عه‌ره‌بی‌.

5- به‌ڵگه‌ی‌ له‌ دایكبوونی‌ منداڵه‌كه‌ به‌ زمانی‌ عه‌ره‌بی‌.

6- پێناسی‌ باری‌ شارستانی‌ و ره‌گه‌زنامه‌ی‌ دایك و باوكی‌ دایكی‌ منداڵه‌كه‌، واته (باپیر و داپیر)ی منداڵه‌كه‌.

7- پشتگیریی‌ شوێنی‌ نیشته‌جێبوون (تأید سكن) ی فه‌رمیی دایكه‌كه‌ و منداڵه‌كانی‌ پێوه‌ بێت، به‌ زمانی‌ عه‌ره‌بی‌.

8- وێنه‌ی‌ تۆماری‌ ساڵی‌ (1957) دایكه‌كه‌ و باپیر و داپیری‌ منداڵه‌كه‌.

بەڕێوەبەرایەتیی گشتیی ره‌گه‌زنامه‌ی هه‌رێمی كوردستان راشیدەگەیەنێت: "دوای‌ وردبینی‌ كردنی‌ به‌ڵگه‌كان له‌ لایه‌ن فه‌رمانگه‌ی‌ باری‌ شارستانی‌، یان فه‌رمانگه‌ی‌ كارتی‌ نیشتمانی‌، كاری پێویست ئه‌نجام ده‌درێت و دواتر به‌ نووسراێك ئاراسته‌ی به‌ڕێوه‌به‌رایه‌تیی گشتیی ره‌گه‌زنامه‌ی به‌غدا ده‌كرێت و به‌ رێگای گشتیی ره‌گه‌زنامه‌ی هه‌رێمی كوردستان، نووسراوه‌كه‌یان بۆ به‌رز ده‌كرێته‌وه‌".

ھ.م