دو شەنگستەیێن بھێز كرنا كوردستانێ

Kurd24

دو شەنگستەیێن بھێز كرنا كوردستانێ پارتی د ده‌مێ حوكمرانیا خوە دا بكردار سەلماندیە كو حزبەكا رێبەر و پێشەنگە د ئیدارە دان و رێڤەبرنا وەلاتی دا، بـ شارەزایانە و بەرپرسانە ب سیاسەتەك حەكیمانە كوردستان ژ قەیران و دابەشبونا قەوارێ سیاسیێ ھەرێما كوردستانێ پاراستیە. شەرێ داعشێ، شەرێ سیاسیێ حكومەتا عێراقێ برێكا بڕینا بودجە و موچێ خەلكێ كوردستانێ، ھاتنا ملیونان ئاوارە و پەنابەران، هاتنا خوارا بھایێ نەفتێ، دژایەتیكرنا سیاسەتا سەربەخویا ئابوری یا ھەرێما كوردستانێ، داخستنا فروكەخانە و دەرگه‌هێن سنوری و شەڕێ سەربازی و یاسایی ب تایبەتی پشتی رویدانێن ١٦ ئوكتوبەرێ، ھەڕەشەیەكا جدی لسەر خەلك و قەوارێ سیاسیێ ھەرێما كوردستانێ دروست كر.

لێ دو كاراكتەرێن سیاسیێن بھێزێن كوردستانێ بەرێزان (نێچیرڤان بارزانی وەك سەروكێ حكومەتێ و مەسرور بارزانی وەك سەروكێ جڤاتا ئاسایشێ) لژێر رێنەمایێن سەرۆك بارزانی میحوەرێن چارەسەریا كێشە و دەرباز كرنا قەیرانێن سیاسی و ئابوری بوون، و شیان لسەر ئاستێ ئەمنی و ئاسایش پێگەھێ ھەرێما كوردستانێ ڤه‌گه‌رینن، بـ پلان و بێھن فرەھی و سیاسەتا دان بخوەدا گرتنێ و دروستكرنا سەقامگیڕیا سیاسی و ئیداری لـ ناڤخو یا ھەرێما كوردستانێ، قەوارێ سیاسی بپارێزن و ب سیاسەتا نەرم و دیپلوماسیەتەكا سەركەفتیانە وان دۆرپێچێن سیاسی لسەر ھەرێما كوردستانێ ھەین بشکێنن و رایا جیھانێ سەر كوردستانێ بینە دەنگ.

پارتی ھەردەم بـ كاندید كرنا كاراكتەرێن خویێن بھیز بۆ حكومەت و دەزگەھێن ئەمنی، پێگەھێ كوردستانێ بھێز ھێلایە و ب تایبەتی بریارا دوھی یا سەركردایەتیا پارتی بۆ كارا كرنا پۆستێ سەرۆكایەتیا ھەرێما كوردستانێ رژدی و خاستەکا پارتی بۆ كاراكرنا ڤێ پۆستس دگەھینیت ، نەخاسمە كو د یاسایا هه‌لاویستنا پۆستێ سەروكاتیا ھەرێما كوردستانێ دا ھاتیە كو ( د ده‌مێ سالا ئێكێ یا خولا پێنجێ یا پەرلەمانێ كوردستانێ دا پێدڤیە چارەنڤیسێ پۆستێ سەروكاتیا ھەرێما كوردستانێ ئێك لا بیت ) بو جێبەجێكرنا دەقێ ڤێ یاسایێ و پرۆسا حوكمرانی و سازیێن ھەرێما كوردستانێ و بو ھندێ كو گرنگیا پۆستێ سه‌رۆكاتیا هه‌رێما كوردستانێ بەرجەستە ببیت و دەستھەلاتێن جێبەجێکرنێ دناڤبەرا حكومەت و سەروكایەتیا ھەرێمێ دابەش ببن، پارتی گونجاوترین و بھێزترین كاندیدێن خوە بەرێز نێچیرڤان بارزانی بۆ پوستێ سەروكێ ھەرێما كوردستانێ و بەرێز مەسرور بارزانی بۆ پوستێ سەروكێ حكومەتێ دیار كر .

ئەڤ دو بریارە دێ پێگەھەكێ بھێزتر بۆ كوردستانەكا سەقامگیرتر دروست کەت. و ئەڤ دو كەسایەتیێن بھێز وەك دو کارەکتەرێن سەرەكی و خودان ئەزموون و شارەزا د دەستھەلاتا جێبەجێكرنێ دا لژێر مەرجەعیەتا سەروك بارزانی ، حكومەت و ھەرێمەكا سەقامگیر و خودان پێگەھێ سیاسی و یاسای د پاشه‌رۆژا كوردستانێ دا مسوگەر کەن.