بەڤیدیۆ.. لە عێراق هێرش كرایە سەر كاروانی بارهەڵگرانی ئەمەریكا
K24- هەولێر:
گرتەیەكی ڤیدیۆیی لە میدیا عێراقییەكان بڵاوبووەتەوە و لە دیمەنەكانیدا نیشان دەدرێت كاتێك ئاگر لە ژمارەیەك ئۆتۆمبیلی بارهەڵگری ئەمەریكی بەردراوە كە پێداویستیی لۆجستییان هەڵگرتبوو و وەك دەگوترێت: لەلایەن ژمارەیەك چەكداری نەناسراوەوە لەسەر رێگەی سەرەكی نێوان سەماوە و دیوانییەی باشووری عێراق كراونەتە ئامانج.
لە دیمەنەكانیدا نیشان دەدرێت كە ئاگر هەموو بارهەڵگرەكانی تەنیووە و لەسەر شەقامەكە بە تەواوەتی سووتێنراون.
سەرچاوەیەكی ئەمنیی عێراقی هەواڵەكەی بۆ عەرەبییە حەدەس پشتڕاست كردەوە و رایگەیاند، ژمارەیەك چەكدار سێ بارهەڵگری گواستنەوەی ئۆتۆمبیلی سەربازی جۆری هامفییان لە ناوچەی نەجمیی نێوان سەماوە و پارێزگای دیالە لە باشووری عێراق كردووەتە ئامانج و گوتیشی: كاروانەكە تەنیا دوو شۆفێری عێراقییان لەگەڵ بووە و چەكداران ئەو دوو شۆفێرانەیان هێناوەتە خوارەوە و ئاگریان لە كاروانی بارهەڵگرەكان بەرداوە.
هەر بەگوێرەی ئەو سەرچاوەیە، ئەو كاروانە تایبەت بوو بە پشتیوانی لۆجستیی سەر بە باڵیۆزخانەی ئەمەریكا لە بەغدا و گوتیشی: هێزە ئەمنییەكان شوێنی رووداوەكەیان تەنیووە.
H.B