کرێى خوێندن لە زانكۆ و پەیمانگە تایبەتەکان بەڕێژەى (10بۆ 20%) کەمکرایەوە
K24 – ههولێر:
بەڕێوەبەرایەتى راگەیاندنى وەزارەتی خوێندنی باڵای حكومهتی ههرێمی كوردستان، رایگهیاند، "بە لەبەرچاوگرتنى بارودۆخى دارایى هاووڵاتیان، وەزارەتهكهیان، کرێى خوێندن لە زانکۆ و پەیمانگە تایبەتەکان بەپێى ئەنجامەکانى رێزبەندى نیشتیمانى زانکۆکانى ههرێمی کوردستان، بەڕێژەى (10 بۆ 20%) بۆ سەرجەم قۆناغەکانى خوێندنى ساڵى (2020 - 2021) کەمکردەوە.
به گوێرهی راگهیهندراوی وهزارهت، ئهمڕۆ له كۆبوونهوهیهكدا، ئارام محمد قادر، وەزیرى خوێندنى باڵا و توێژینەوەى زانستى رایگهیاند، هەرێمى کوردستان بە بارودۆخێکى تایبەت گوزەر دەکات بە شێوەیەک پێویستە هەموان رەچاوى بارو گوزەرانى دارایى خەڵکى خۆمان بکەین و لە هەمانکاتیشدا بتوانین هەلى خوێندن بۆ هەموان دەستەبەر بکەین.
به گوێرهی بڕیارهكهی وهزارهت، كرێی خوێندن بهم جۆره كهمدهكرێتهوه:
* ئەو زانکۆیانەى دەکەونە گروپى B، بەڕێژەى (10%) کرێى خوێندن کەمدەکرێتەوە.
* ئەو زانکۆیانەى دەکەونە گروپى C، بەڕێژەى (15%) کرێى خوێندن کەمدەکرێتەوە.
* ئەو زانکۆیانەى دەکەونە گروپى D، بەڕێژەى (20%) کرێى خوێندن کەمدەکرێتەوە.
* سەرجەم پەیمانگە تایبەتەکان و کۆلێژە زانکۆییەکان بەڕێژەى (20%) کرێى خوێندنیان کەمدەکرێتەوە.