رۆژی ناردنی مووچه‌ی فه‌رمانبه‌رانی هه‌رێم دیاریكرا

مه‌سعوود حه‌یده‌ر: له‌ كۆبوونه‌وه‌ی سێ سه‌رۆكایه‌تییه‌كه‌دا به‌ڵینیداوه‌

K24 - هه‌ولێر:

پەرلەمانتارێکی کورد، رایده‌گه‌یه‌نێت، حه‌یده‌ر عه‌بادی سەرۆکوەزیرانی عێراق پێی گووتین تا 15ـی ئەم مانگە مووچەی فەرمانبەرانی هەرێمی کوردستان دەنێرم.

مەسعود حەیدەر ئەندامی لێژنەی دارایی لە پەرلەمانی عێراق بەکوردستان24ـی راگه‌یاد: "لە کۆبوونەوەی سێ سەرۆکایەتییه‌کەی عێراق لە ماڵی سەرۆککۆمار بەفەرمی داوامان لە سەرۆکوەزیرانی عێراق کرد کە مووچەی فەرمانبەرانی هەرێمی کوردستان بنێرێت، چونکە مووچەخۆران چاویان لەجێبەجێکردنی بەڵێنەکانە و دۆخی ئابوری خه‌ڵكیش خراپە".

بەگووتەی ئەو پەرلەمانتاره کە لەسەر فراکسیۆنی گۆڕانە لەبەغدا، لەبەرامبەردا حەیدەر عەبادی سەرۆکوه‌زیرانی عێراق بەئامادەبوونی سەرۆک کۆمار بەڵێنیداوه‌ تا 15/3 مووچەی فەرمانبەرانی هەردوو وەزارەتی تەندروستی و پەروەردە بنێرێت.

ئەو ئەندامه کوردەی لێژنەی دارایی دەڵێت: "داوامان لە سەرۆکوزیرانی عێراق کرد ڕێز لە دەستور بگرێت و شایستە داراییەکانی هەرێمی کورستان مافێکی دەستوری و یاسایی خەڵکە".

قسه‌كانی ئه‌و ئه‌ندام په‌رله‌مانه‌ی عێراق له‌ كاتێكدایه‌، هه‌ر ئه‌مڕۆ پێنجشه‌ممه‌ 8/3/2018 لیژنه‌ی وردبینی سه‌ر به‌ حكومه‌تی فیدراڵی عێراق رایگه‌یاندووه‌: "له‌ ماوه‌ی 10 رۆژی داهاتوودا مووچه‌ی دوو وه‌زاره‌تی حكومه‌تی هه‌رێمی كوردستان دابه‌ش ده‌كرێت".

له‌وباره‌یه‌وه‌ ڤیان جاف، به‌ڕێوه‌به‌ری پلاندانان له‌ وه‌زاره‌تی ته‌ندرووستی حكومه‌تی هه‌رێمی كوردستان به‌ میدیاكانی راگه‌یاندووه‌: "ژماره‌یه‌ك ئه‌ندامی لیژنه‌ی وردبینی سه‌ر به‌ حكومه‌تی عێراق ته‌ئكیدیان كردووه‌ته‌وه‌، له‌ ماوه‌ی 10 رۆژی داهاتوودا مووچه‌ی هه‌ر دوو وه‌زاره‌تی ته‌ندرووستی و په‌روه‌رده‌ خه‌رج ده‌كرێت".

هه‌روه‌ها گووتی: "هه‌تا ئێستا نازانین شێوازی دابه‌شكردنی مووچه‌كه‌ چۆنه‌ كه‌ حكومه‌تی عێراق په‌یڕه‌وی ده‌كات، به‌ڵام لیژنه‌ی وردبینی ته‌ئكیدیان كردووه‌ته‌وه‌ كه‌ پاره‌كه‌ دیاریكراوه‌و به‌مزووانه‌ مووچه‌كه‌ دابه‌ش ده‌كرێت".

ڤیان جاف ئاماژه‌ی به‌وه‌كرد، هیچ كێشه‌ و گرفتێكی گه‌وره‌ له‌ لیستی مووچه‌ی وه‌زاره‌تی په‌روه‌رده‌ و ته‌ندرووستیدا نییه‌، به‌ڵام هه‌ندیك سه‌رنجی كه‌م هه‌بووه‌و دوای خه‌رجكردنی مووچه‌كه‌ ئه‌وانه‌یش چاره‌سه‌ر ده‌كرێن".

یه‌كه‌مجار نییه‌ به‌غدا پرسی خه‌رجكردنی مووچه‌ی فه‌رمانبه‌رانی هه‌رێم، به‌تایبه‌تی هه‌ر دوو وه‌زاره‌تی په‌روه‌رده‌ و ته‌ندرووستی ده‌ورژێنێ و دواجار حه‌یده‌ر عه‌بادی سه‌رۆكوه‌زیرانی عێراق رۆژی سیشه‌ممه‌ی رابردوو له‌ كۆنگره‌ی میدیایی هه‌فتانه‌یدا گووتی: "پێش نه‌ورۆز مووچه‌كه‌ ده‌نێرین و فڕۆكه‌خانه‌كانیش به‌ رووی گه‌شته‌ نێوده‌وڵه‌تییه‌كاندا ده‌كه‌ینه‌وه‌.

هه‌ر ئه‌مڕۆ سه‌فین دزه‌یی گوته‌بێژی حكومه‌تی هه‌رێمی كوردستان رایگه‌یاند: "هه‌فته‌ی رابردوو په‌یوه‌ندییه‌كی ته‌له‌فۆنی له‌نێوان نێچیرڤان بارزانی و حه‌یده‌ر عه‌بادی ئه‌نجامدراوه‌و قسه‌كانیان له‌ چوارچێوه‌ی ناردنی مووچه‌ و كردنه‌وه‌ی فڕۆكه‌خانه‌كان بووه‌".