نێچيرڤان بارزانى په‌يامێك ئاراسته‌ى ئێزدييه‌كان ده‌كات
K24 – هه‌ولێر:
به بۆنه‌ى "جه‌ژنى رۆژوو"ى ئێزدييه‌كانه‌وه، سه‌رۆكى ئه‌نجوومه‌نى وه‌زيرانى هه‌رێمى كوردستان، نێچيرڤان بارزانى په‌يامێكى ئاراسته‌ى ئێزدييه‌كان كرد.
له په‌يامه‌كه‌يدا، نێچيرڤان بارزانى دووپاتيكردووه‌ته‌وه، "تا رفێندراوێكى ئێزدى له ده‌ستى داعشدا مابێت، له هه‌وڵى به‌رده‌وامدا ده‌بن بۆ رزگاركردنیان".
ئه‌مه ده‌قى په‌یامه‌كه‌یه:
ب گه‌رمى جه‌ژنا "ڕۆژى یێت ئێزى" ل خوشك و برایێت هێژایێت ئێزدى ل كوردستانێ و هه‌ر ده‌ره‌كا دنیایێ هه‌بن، پیرۆز دكه‌م. هیڤیدارم جه‌ژنه‌كا خۆش و ئارام ده‌رباس بكه‌ن و جه‌ژن ببێته ئه‌گه‌رێ بجهبوونا زێده‌ترا ئاشتیێ و پێكڤه‌ژیانێ و ڤه‌گه‌ڕیانا خێر و خۆشیێ بۆ خوشك و برایێت مه یێت ئێزدى و هه‌مى خه‌لكێ كوردستانێ.
ئه‌ڤ جه‌ژنه ژى جاره‌كا دى د ده‌مه‌كێدا ڤه‌دگه‌ڕیت كو مخابن هێشتا هژماره‌كا مه‌زنا ئێزدییان د كامپێت ئاواره‌ییێدا دژین و نه‌شیاینه ڤه‌گه‌ڕنه سه‌ر جهـ و وارێت خۆ. هیڤیدارم جه‌ژنێت بهێن هه‌مى ب سه‌رفرازى ڤه‌گه‌ڕیابن سه‌ر جهـ و وارێت خۆ یێت ئارام و ئاڤه‌دانكرى و حكوومه‌تا هه‌رێما كوردستانێ دێ هه‌موو هه‌ولێ ژبۆ ڤێ یه‌كێ ده‌ت.
هه‌ر ب ڤێ هه‌لكه‌فتنێ هه‌مى خوشك و برایێت مه یێت ئێزدى پشتڕاست ده‌كه‌ین كو هه‌تا خوشكه‌ك یان برایه‌كێ مه یێ ئێزدى یێ ڕه‌ڤاندى ل ناڤ داعشێ یان ل هه‌ر جهه‌كێ مابیت، ئه‌م دێ به‌رده‌وام هه‌وڵ ده‌ین وان ڕزگار بكه‌ین و ڤه‌گه‌ڕینین ناڤ كه‌سوكارێت وان.
سلاڤ و دروود بۆ گیانێ هه‌مى قوربانیێت ده‌ستێ تیرۆرێ و ئه‌م ب ڕێز و حورمه‌ت وان ب بیر تینین.
جاره‌كا جه‌ژنا هه‌میان پیرۆز بیت.
نێچیرڤان بارزانى
سه‌رۆك وه‌زیرێ هه‌رێما كوردستانێ
14/12/2018