كابینه‌یا نه‌هێ چەند ھێلێن گشتی یێن پۆلێن کری ئێخستن سەر ملێ خوە
دوو سال ب سەر کابینەیا نەھێ یا حکومەتا ھەرێما کوردستانێ دەربازبوون، کو ل رۆژا 10 تەمووزا 2019 ل پەرلەمانێ کوردستانێ باوەری ب وێ کابینێ ھاتە دان، بەرێز مەسرور بارزانی وەك کاندیدێ پارتی دیموکراتی کوردستان بۆ سەرۆك وەزیریێ ھاتە ھەلبژارتن.
ڤێ کابینێ ژی چەند ھێلێن گشتی یێن پۆلێن کری، ل سەر ئاستێ چاکسازی، خزمەتگوزاری، پەیوەندیێن ناڤبەرا ھەولێر و بەغدایێ، ئازادی و دیموکراسی، پێکڤە ژیانێ و پەیوەندیێن ھەرێمێ ل سەر ئاستی ھەرێمی و نیڤ دەولەتی، ئاستێ ئابووری، دارایی و کارگێری ئێخستن سەر ملێ خوە.
ئەڤرۆ دوو سال ب سەر کابینەیا نەھێ ب سەرۆکاتیا بەرێز مەسرور بارزانی دەرباز بوون و زێدەباری رێگری و قەیران و ڤایروسێ کۆرۆنایی، پرانیا وی بەرنامێ ئێخستین سەر ملێ خوە ھاتنە جێبجێکرن و ھندەك کار ل سەر دھێتە کرن و ھندەك ژی کەتنە د بەرنامەیا کارێ حکومەتێ دا.
کار ھاتیە کرن بۆ چاکسازیێ د کەرتێ وەزیفەیا گشتی و چارەسەر کرنا رێکخستنا دەوامێ و نە ھێلانا روتینێ د ب رێڤەبرنا کارێ وەلاتیان و رێزگرتنا وان ل دامودەزگەھێن فەرمی دا، ھەروەسا رێگری ل بەرپرسێن بلند یێن حکومەتێ ھاتیە کرن کو پێگەھێ خوە یێ کارگێری بۆ بازرگانی و زەنگینبوونێ ب کار بینن و ب ھەمی شیانێن خوە رووبروویێ گەندەلیا دارایی و کارگێری بوویە.
ھەروەسا کابینەیا نەھێ بەردەوام پشتەڤانێ کارێ چاڤدێریی یێ پەرلەمانێ کوردستانێ بوویە، ژ روویێ خزمەتگوزاری ڤە ژی کارێ باش بۆ چێکرنا رێ و پران و خوەشکرنا جادەیان ل ھەمی پارێزگەھێن ھەرێمێ و تا رادەیەکێ باش کار ل سەر ئاستێ بەرھەمئینانا کارەبێ و زێدەکرنا دەمژمێرێن پێدانا کارەبێ ب وەلاتیان ھاتیە کرن و کار ل سەر وێ ئێکێ بەردەوامە داكو 24 دەمژمێرن رۆژانه کارەب ب وەلاتیان بێیە دان.
سەبارەت کەرتێ کشتوکالێ ژی بەرەڤ پێشچوونێن باش ب خوە ڤە دیتیە، چ ژ روویێ ئاڤاکرنا چەند سایلویێن عەمبارکرنا گەنمی و دروسکرنا کارگەھێن ئاری و ب گشتی ٩٪ بەرمەھێ کشتوکالێ زێدە بوویە.
کابینەیا نەھێ بەردەوام کار کریە كو د ھەر 30 رۆژان دا مووچە ب وەلاتیان بێتە دان و بەراورد دگەل سالێن بووری دانا مووچەیی باشتر بوویه، ھەروەسا هه‌ولێن ھێلانا برینا 21٪ به‌رده‌وامن.
ب گشتی ئاستێ بەرھەمئینانێ د ڤێ کابینێ دا بەرەڤ زێدەبوونێ چوویە و ئاڤاکرنا چەند کارگەھان ل ھەموو پارێزگەھێن ھەرێمێ بەلگەنە ل سەر ئاخفتنا مە و دەلیڤا کاری بۆ 50 ھزار کەسان پەیدا کریە.
ژ روویێ گەشت و گوزارێ ژی ڤه، ھەرێما کوردستانێ بەرەڤپێشچوونێن باش ب خوە ڤە دیتیە و حکومەتا ھەرێما کوردستانێ گرنگیێ ب جھێن گەشتوگوزارێ دایە و رێژەیا گەشت و گوزارێ ل ھەرێما کوردستانێ زێدەکریە.
ھەروەسا دڤێ کابینێ دا زێدەباری ھاتنا ڤایروسێ کۆرۆنایێ، لێ ھەر کەرتێ تەندورستی و پەروەردێ رۆژ بۆ رۆژێ بەرەڤ باشتر دچت و کار ل سەر باشترکرنا وان ھەردوو کەرتان بەردەوامە.
ئێک ژ دەستکەفتێن ڤێ کابینێ ب ئەلکترونی کرنا کاروبارێن وه‌ڵاتیایه، چ د ئاستێ کاروبارێن ناڤخوە یێن فەرمانگەھان و چ د ئاستێ پێشکێشکرنا خزمەتگوزاریێن ئەلکترۆنی دا بۆ وەلاتیان.
ھەروەسا دگەل دەست ب کاربوونا کابینەیا نەھێ، پەیوەندیێن دگەل حکومەتا ناڤەندی یا عێراقێ ھاتنە باش کرن و بەردەوام شاندێن حکومەتا ھەرێمێ سەرەدانا بەغدا دکر و تا نوکە ژی ئەو سەرەدان بەردەوامن بۆ ب دەست ڤە ئینانا مافێن دەستووری یێن خەلکێ ھەرێما کوردستانێ، تا نوکە وان سەرەدانان ئەنجامێن باش ھەبوونە.
ھەروەسا کارەك باش ھاتیە کرن، بۆ چەسپاندنا لامەرکەزیەتا ئیداری یا پارێزگەھان، کو گونجای بیت دگەل سیستەمێ یاسایی و کارگێری یێ ھەرێما کوردستان و شۆرکرنا دەستھەلاتێ و دابەشکرنا ئەرك و بەرپرسیاریەتیێ ل گوری یاسایێ و لژێر چاڤدێریا سەرۆکاتیا حکومەتێ.
ھەروەسا چەند بریارێن دی ژی یێن گرنگ ژ وان ئیدارەیا سەربخوە یا زاخۆ کو خەونا ھەمی خەلکێ زاخۆ بوو، قەزابوونا باتیفا.
پیرۆز بیت بوورینا دوو سالان ب سەر کابینەیا نەھێ یا حکومەتێ و ب ھێڤینە کار ل سەر بەرنامێ وان یێ چار سالی بەردەوام بت.