یوئێن: كاولكاریی رومادی له هیچ شوێنێكی دیكه‌ی عێراق نه‌بینراوه
K24 – هه‌ولێر:
دوای رزگاركردنی شاره‌كه له سه‌ره‌تای ئه‌مساڵ له‌لایه‌ن هێزه عێراقییه‌كانه‌وه له بنده‌ستی داعش، بۆ یه‌كه‌مجار تیمێكی سه‌ر به نه‌ته‌وه یه‌كگرتووه‌كان سه‌ردانی شاری رومادیان كرد.
ليز گراند هه‌ماهه‌نگیكاری نه‌ته‌وه یه‌كگرتووه‌كان بۆ پڕۆسه مرۆییه‌كان له عێراق گوتی: "ئه‌و وێرانبوونه‌ی تیمه‌كه له رومادی بینیویه‌تی له هیچ شوێنێكی دیكه‌ی عێراق نه‌یبینیوه".
ئه‌مڕۆتیمه‌كه‌ی سه‌ر به نه‌ته‌وه یه‌كگرتووه‌كان رایگه‌یاند: "سه‌ره‌ڕای وێرانبوونی هه‌زاران خانوو، نه‌خۆشخانه و وێستگه‌ی شه‌مه‌نده‌فه‌ری سه‌ره‌كی شاری رومادی وێرانبوونه".
به‌رپرسانی خۆجێی شاری رومادی به تیمه‌كه‌ی نه‌ته‌وه یه‌كگرتووه‌كانیان راگه‌یاندووه: "64 پرد و تۆڕی كاره‌بای شاره‌كه‌ش وێرانبوونه".
تیمه‌كه‌ی نه‌ته‌وه یه‌كگرتووه‌كان ئاماژه‌ی بۆ ئه‌وه‌كردووه: "له نێو هه‌ر سێ یان چوار خانوویه‌ك یه‌كێكیان زیانی به‌ركه‌وتووه".
تیمه نێوده‌وڵه‌تییه‌كه روونیكردووه‌ته‌وه: "زۆرترین ته‌قینه‌وه‌كان له باشوور و ناوه‌ڕاستی شاره‌كه روویانداوه، ده‌شكرێ به زوویی تۆڕی ئاوی رومادی چاكبكرێته‌وه".
تیمه‌كه ئاماژه‌ی بۆ ئه‌وه‌شكرد: "ئه‌گه‌ری هه‌یه له چوار ناوچه بتوانرێ پێشوازی له هاووڵاتیانی گه‌ڕاوه بۆ ناو رومادی بكرێن".
لای خۆشییه‌وه حكوومه‌تی عێراق هێمای بۆ ئه‌وه‌كردووه مه‌ترسی له‌سه‌ر گه‌ڕانه‌وه‌ی دانیشتوان نه‌ماوه، كه‌چی دانیشتوانی رومادی دووپاتیانكردووه‌ته‌وه: "شاره‌كه‌یان به كه‌ڵكی ژیان به‌سه‌ردن تیایدا نه‌ماوه".
سه‌ره‌ڕای ئه‌وه‌ش داوایانكردووه: "رێگایان بدرێ بگه‌ڕێنه‌وه شاره‌كه"، به‌و پێیه‌ی گه‌ڕانه‌وه له "په‌ڕاگه‌نده‌یی" و نیشته‌جێبوون له ناو خێوه‌ته‌كان باشتره.
مانگی رابردووش نه‌ته‌وه یه‌كگرتووه‌كان شیكردنه‌وه‌یه‌كی له رێی مانگه ده‌ستكرده‌كان ئه‌نجامدابوو، به گوێره‌ی شیكردنه‌وه‌كه: "له ناوه‌ڕاستی 2014 تا ئێستا نزیكه‌ی 5700 باڵه‌خانه و نزیكه‌ی 2 هه‌زار خانوو له رومادی و ده‌وروبه‌ری به ته‌واوه‌تی وێرانبوون".
ئاماژه‌ی بۆ ئه‌وه‌شكردووه: "زووه بزانرێ ئاوه‌دانكردنه‌وه و بنیاتنانه‌وه‌ی شاره‌كه چه‌ند كات و پاره‌ی ده‌وێ".
به گوێره‌ی ئه‌وه‌ی رۆژنامه‌ی (عه‌ره‌بی جه‌دید) دۆكیومێنتی كردووه: "شاری رومادی به كه‌ڵكی ژیانی مرۆڤ نایه‌ت، به‌هۆی بوونی ته‌رمی هێزه‌كانی عێراق و چه‌كدارانی داعش له ژێر خۆڵ و به‌ردی شاره‌كه، هه‌ڕه‌شه‌ی كاره‌ساتێكی ژینگه‌یی و بڵاوبوونه‌وه‌ی نه‌خۆشییه‌كان ده‌كا".
رۆژنامه‌كه ئه‌وه‌شی راگه‌یاندووه جگه له پیسبوونی ژینگه و مه‌ترسیی بڵاوبوونه‌وه‌ی نه‌خۆشییه‌كان "هێشتا چه‌كدارانی داعش مایه‌ی هه‌ڕه‌شه‌ن بۆ‌سه‌ر شاره‌كه".
به گوێره‌ی خه‌مڵاندنه‌كانی پسپۆڕان: "هه‌ندێك له شوێنه‌كانی رومادی به رێژه‌ی زیاتر له 80% زیانیان به‌ركه‌وتووه و پێویستیان به شیاندنه‌وه‌ی ژێرخانه‌كان هه‌یه".
سه‌رچاوه: ماڵپه‌ڕی مركز الروابط , و: م.ح