لە شەڕی قامیشلۆ 58 كەس گیانیان لە دەستداوە
K24 - ھەولێر:
بە گوێرەی ئاماری تەندروستی كانتۆنی جزیرێ لە شەڕی سێ رۆژی رابردووی نێوان ھێزەكانی ئاسایش و یەپەگە بەرامبەر بە رژێمی سووریا لە قامیشلۆ 58 كەس لە ھەردوولا گیانیان لە دەستداوە.
لە لێدوانێكی تایبەت بۆ (كوردستان24) عەبیر عەساف، سەرۆكی دەستەی تەندورستی كانتۆنی جزیرێ رایگەیاند: "لە ماوەی سێ رۆژی رابردوودا، شەڕ و پێكدادان لە نێوان ھێزی ئاسایشی رۆژئاوای کوردستان و ھێزەکانی سوپای سووریا لە قامیشلۆ روویدا و بەھۆیەوە، 17 كهسی سڤیل و 10 شەرڤانی یەپەگە و 31 سەربازی رژێمی سووریا گیانیان لە دەستداوە".
گوتیشی: "تا ئێستا 20 بریندار لە نەخۆشخانەدا لە ژێر چاودێری تەندروستیدان، 3 لەو بریندارانە باری تەندروستیان خراپە و پێویستیان بە نەشتەرگەری ھەیە".
میدیاكانی پارتی یەكێتی دیموكرات بڵاویان كردوەتەوە: "102 ئەندامی رژێمی سووریا لە لایەن ھێزەكانی یەپەگە و ئاسایشی رۆژئاوای كوردستان بە دیل گیراون".
لە 20ی نیسانی 2016، لە شاری قامیشلۆ شەڕ لە نێوان ھێزەكانی ئاسایشی رۆژئاوا و رژێمی سووریا روویدا، ئێوارەی دوێنێ 22 نیسان ھێزەكانی ئاسایش و یەپەگە لە ئاگربەستیان راگەیاند.