خۆکوژێک کە بەنیاز بووە لە بەغدا خۆی بتەقێنێتەوە، دەستگیر کرا
K24 - هەولێر
دەزگای ئاسایشی نیشتمانیی عێراق، ئەمڕۆ دەستگیرکردنی کەسێکی راگەیاند، کە بەنیازبووە لە شەقامێکی بەغدا خۆی بتەقێنێتەوە.
لیوا یەحیا رەسوول، گوتەبێژی فەرماندەی گشتیی هێزە چەکدارەکانی عێراق ئەمڕۆ (سێشەممە، 2ـی شوبات/ فێبرایەرـی 2021) رایگەیاند کەسێک دەستگیرکرا، کە پێشتر بەنیاز بووە لە بەغدای پایتەخت خۆی بتەقێنێتەوە.
بەپێی راگەیەندراوەکە، دەزگای ئەمنی نیشتمانی لە پارێزگای سەڵاحەدین و دیالە "توانیویانە شانەیەکی تیرۆرستی دەستگیربکەن کە لە چوار ئەندام پێکهاتبوون. یەکێک لەوان خۆکوژەکە بووە، ئەوانەی دیکەش هەریەکەیان ئەرکێکی هەبووە، بەمشێوەیە: فەرماندەی شاندەکە، شۆفێر و سەرباز".
دەستگیرکردنی خۆکوژەکە لەکاتێکدایە، لەدوای دوو تەقینەوە خۆکوژییەکەی مانگی رابردووی بەغدا، کە بەهۆیانەوە نزیکەی 35 کەس کوژران و زیاتر لە 100 کەسی دیکە برینداربوون، دەنگۆی ئەوە هەبوو: سێ خۆکوژی دیکە لە بەغدان و بەنیازن هەمان کردەوە ئەنجامبدەن.
ئەو ئۆپەراسیۆنە لەکاتێکدا بوو: لەماوەی چەند کاتژمێری رابردوودا لە بەغدا، بۆمبێکی چێندراو لەبەردەم دووکانێکی مەیفرۆشتن لە ناوچەی بهسمایەی باشوور و بۆمبێكی دیکەش لەبەردەم سەنتەرێکی مەساج لە ناوچەی کەڕادە تەقینەوە، کە زیانی گیانیان بەدواوەنەبوو.