پرۆسەی بەفەرمی ناساندنی جینۆسایدی ئێزدییان لە پەرلەمانی بەلجیکا دەستیپێکرد
K24 - هەولێر
بە دەستپێشخەری "پەرلەمانتاری دۆستی کوردستان"، دکتۆر جۆرج دالامان لە پارتی CDHـی بەلجیکی و بە پاڵپشتی پارتی NVA، ئەمڕۆ لە پەرلەمانی بەلجیکا پرۆژەی بە فەرمی ناساندنی جێنۆسایدی ئێزدییان دەستیپێکرد.
دلاوەر ئاژگەیی، نوێنەری حکومەتی هەرێمی کوردستان لە یەکێتیی ئەوروپا لە راگەیەندراوێکدا ئەمڕۆ (پێنجشەممە، 4ـی شوبات/فێبرایەرـی 2021) رایگەیاند "بڕیارە ئەم پرسە لە لیژنەی پەیوەندییەکانی دەرەوەی پەرلەمانی بەلجیکا تاوتوێ بکرێت و دواتر لە دانیشتنێکی فەرمیی پەرلەمانی ئەو وڵاتە بخرێتە دەنگدانەوە".
نوێنەرایەتی حکومەتی هەرێمی کوردستان لە یەکێتی ئەوروپا لە پەیوەندیدا لەگەڵ جۆرج دالامان بەپێی راگەیەندراوەکەی دلاوەر ئاژگەیی "سوپاسی هەوڵەکانی کرد و پشتگیری و هاوکاری حکومەتی هەرێمی بە مەبەستی سەرخستنی پرۆژەکە راگەیاند".
دکتۆر دالامان بە گوتەی نوێنەری حکومەتی هەرێمی کوردستان لە یەکێتیی ئەوروپا، دۆستی نزیکی کوردستانە و لەکاتی تەنگانەدا پشتگیری کوردستانی کردووە و چەندجار سەردانی هەرێمی کوردستان و رۆژئاوای کوردستانی کردووە.
د. دالامان، ئەندامی لیژنەی پەیوەندییەکانی دەرەوەی پەرلەمانی بەلجیکایە و پێشتر ئەندامی رێکخراوی جیهانی پزیشکانی بێ سنوور بووە.
