سەرۆکی حکومەتی هەرێمی کوردستان پێشوازی لە نادیە موراد دەکات
K24 – ههولێر:
ئەمڕۆ یەکشەممە 2021/2/7 مەسرور بارزانی، سەرۆکی حکومەتی هەرێمی کوردستان پێشوازی لە نادیە موراد چالاکیی ئێزدی و رزگاربووی دەستی داعش کرد.
لە دیدارەکەدا سەرۆکی حکومەتی هەرێمی کوردستان، دووپاتی کردەوە کە حکومەتی هەرێم، هەموو هەوڵێکی خۆی خستووەتەگەڕ لە پێناو کەمکردنەوەی ئازار و مەینەتییەکانی خوشک و برایانی ئێزیدی و دابینکردنی ژیانێکی شایستە بۆیان و گەڕانەوەی ئاوارەکان بۆ شوێنەکانیان.
گوتیشی: ئێزیدی پێکهاتەیەکی رەسەن و گرنگی گەلی کوردستانن و هەرێمی کوردستان هەمیشە پشتیوانیی لە داوا رەواکانیان دەکات و سەدان پێشمەرگەش لە پێناو رزگارکردنی شنگالدا شەهید بوون. بۆیە پێویستە دۆخی شنگال ئاسایی بکرێتەوە و ئارامیی بۆ ئەم دەڤەرە بگەڕێتەوە .
نادیە موراد وێڕای جەختکردنەوە لە سەر گرنگیی چڕکردنەوەی هەوڵەکان بۆ دۆزینەوەی ژن و کچە رفێنراو و شوێنبزرکراوەکانی ئێزیدی و ئازادکردنیان و گەڕانەوەی روفاتی تەواوی قوربانییانی گوندی کۆچۆ، داواشی کرد بە زووترین کات رێکەوتننامەی شنگال جێبەجێ بکرێت لە پێناو سەقامگیربوونی دادپەروەریی و ئاشتی لە ناوچەکەدا.
لە دیدارەکەدا هەروەها جەخت لە گرنگیی بەردەوامیی هەماهەنگیکردن لەگەڵ تیمی لێکۆڵینەوە و لێپیچینەوەی نێودەوڵەتی لە تاوانەکانی داعش (یونیتاد) کرا بۆ بەدیهاتنی دادپەروەریی بۆ قوربانییانی ئێزدی دەستی تیرۆریستانی داعش.