ئافرەت لە سۆشیال میدیای كوردیدا.. هەمووان بە یەك چاو!
2
بزاوتی ژیانی مرۆڤایه‌تی، هه‌ر له دروستبوونیه‌وه تا ئێستا، بەردەوام له گۆڕانكاری و نوێبوونه‌وه‌دایه، له‌م سه‌رده‌می گڵۆبالیزم و مۆدێرنیزمەدا، گۆڕانگارییه‌كان، خێرا دێن و خێراش تێده‌په‌ڕن و شتی نوێتریان بەدوادا دێ، سبەی ئەو نوێیانەش كۆن دەبن، وەك كۆمەڵگەش ئه‌م گۆڕانكارییانه‌مان لا قه‌بووڵە یاخود گەلێ جار ناچارین قبووڵی بكەین، به پێچه‌وانه‌ی سه‌رده‌مانی زوو كه هه‌موو گۆڕانكارییه‌ك و بیرێكی نوێ، به بەرپەرچدانە و نه‌خێر و ره‌تكردنه‌وه رووبەڕووی دەبووینەوە، یان فەرامۆشمان دەكرد.
دوای ده‌ركه‌وتنی به‌هێزی سۆشیال میدیا لە پاش ساڵانی 2000ـەوە، تۆڕگەلی سۆشیال میدیا ئه‌و سنووره ده‌ستكرده‌ی مرۆڤایه‌تیی به‌زاند، تاكه‌كان له هه‌ر گۆشەیەكی دنیادا بن، ده‌توانن بێ سانسۆر و نه‌ریته كۆمه‌ڵایه‌تییه‌كان په‌یوه‌ندی به یه‌كتره‌وه بكه‌ن.
بە هاتنی سۆشیال میدیا، مرۆڤایه‌تی دواقۆناغی كلاسیكییەتی بڕی، ریتم و شێوازی ژیان نزیكەی به‌ته‌واوی گۆڕا، دنیای مۆدێرن به‌ڕووی جیهاندا كرایه‌وه، نه‌خاسمه بۆ ئێمه‌ی ئافره‌ت كە ڕۆڵ و كاریگه‌ریمان كاراتر بوو.
قسه‌م لەبارەی هه‌ڵسه‌نگاندنی باش یان خراپی ئه‌و كه‌سانه نییه كه گۆڕاون یان نایانه‌ویت بگۆڕێن، تاك ئازاده له‌وه‌ی چۆن ده‌ژی و چۆن لەگەڵ گۆڕانكارییەكاندا هەڵدەكات، لێ مه‌به‌ستی من له‌سه‌ر ئافره‌تانی نێو سۆشیال میدیای كوردییه، ئاخۆ چۆن ده‌ڕوانێته گۆڕانكارییه‌كان؟ هه‌روه‌ها تێڕوانینی به‌رامبه‌ره‌كانیان لە سۆشیال میدیاوە بۆ ئەوان چۆنە؟
ئەوە چیه كه وێڕای ئەو هەموو گۆڕانكارییانەی بەسەر ژیانی كۆمەڵگەدا هاتن، هێشتا زۆرینه‌ی پیاوانی كورد به‌وانه‌شه‌وه كه خۆیان پێ مرۆڤی مۆدێرنه، قبووڵی بوون و دەنگ و رۆڵێ ئافرەت ناكەن لە سۆشیال میدیادا؟ كە دەڵێم زۆرینەی پیاوانی كورد، مەبەستم زۆرینەی ئەو پیاوە كوردانەیە كە لە سۆشیال میدیاكان هەن و كاران، گەر بە چەمكی (زۆرینە)ش بڕوا ناكەن و پێتانوایە زێدەڕۆیی یان زێدەگۆییم كردووە، دەكرێ بڕۆن كۆمێنت و پۆستی پیاوانی كورد لەسەر دەركەوتنەكانی ئافرەتی كورد بخوێننەوە لە سۆشیال میدیادا، سەرنج لەو هەموو جنێو و سووكایەتی و دێڕە نەشیاوانە بدەن كە پیاوانی كورد لە دژی ئافرەتانی كورد لە سۆشیال میدیادا دەینووسن.
كێشەكەش لەوەدایە، سووكایەتی بە هەموو جۆرە ئافرەتێك دەكرێت، بۆ سەلماندنی ئەو راستیەش، دەكرێ سەرەتا پۆلێنێكی ئەو ئافرەتانە بكەم كە لە سۆشیال میدیادا كاران، دواتر روونی بكەمەوە كە بۆچی هەمووان وەك یەك دەكەونە بەر نەشتەری جنێو و سووكایەتی لەلایەن پیاوانی كوردەوە.
ئافرەتانی كورد، بە گشتی لەنێو سۆشیال میدیادا، بەسەر ئەم گرووپانەدا دابەش دەكرێن: (خانمانی بواری سیاسەت، خانمانی نووسەر و رۆشنبیر و ئەكادیمی و میدیاكار، خانمانی بواری دەروونزانی و كۆمەڵناسی، خانمانی بواری سێكسناسی، خانمانی بواری ئابووری، خانمانی چالاكی مەدەنی، خانمانی بواری هونەر بە هەموو بەشەكانیەوە، خانمانی وەرزشوان و راهێنەری وەرزشی، خانمانی دیاری كۆمەڵایەتی، خانمانی شێف و شارەزای خواردن چێكردن، مۆدێل و مۆدێلیسته‌كان، مه‌یكه‌پ و ئارتیسته‌كان، خانمە وروژێنه‌ره‌كان لەڕووی سێكسیەوە، خانمانی به‌كارهێنه‌ری ساده و بێ مه‌رامی سۆشیال میدیا، خانمانی ئایینی و بانگخواز، خانمانی لەخشتەبەر و هەڵسووڕێنەری هەندێ باندی مەترسیدار).
بێگومان من لەم پۆلێنەدا پشتم بە هیچ توێژینەوەیەكی مەیدانی و ئەكادیمی نەبەستووە، بەڵكوو له روانگه‌ی تێگه‌یشتن و ئه‌زموونی خۆمه‌وه ئه‌م گرووپانه‌م به‌م شێوه‌یه دابه‌شكردووه، لێ هەریەك لەم گرووپانەی ئافرەتان، لەنێو سۆشیال میدیادا بە جۆرێك كار دەكەن و هەر گرووپێكیشیان، بە شێوەیەك كاریگەریی لەسەر كۆمەڵگە و خەڵك و خوێنەر و بینەری سۆشیال میدیا هەیە، واتا جیاوازیی زۆر هەیە لە شێواز و كار و رۆڵ و دەركەوتنی ئەو گرووپە جیاوازانەی ئافرەت لە سۆشیال میدیای كوردیدا.
بەڵام كارەسات لەوەدایە، هەر هەموویان بە رێژەی جیاواز دەكەونە بەر جنێو و سووكایەتیپێكردنی پیاوانی سۆشیال میدیا، بۆ نموونە زۆربەی پیاوانی كوردی نێو سۆشیال میدیا، هیچ جیاوازییەك ناكەن لەنێوان كچێك كە دەیەوێ بە گرتە و جلوبەرگی سێكسی و قسەی سێكسی گەنجان بوروژێنێ و لایك و شەیر و بازاڕ بۆ خۆی كۆ بكاتەوە، لەگەڵ خانمە پزیشكێك كە زانستییانە قسە لەسەر سێكس دەكات و هۆشیاریی سێكسی بە خەڵك دەدات.
خانمێكی شاعیر شیعرێكی جوان بڵاو دەكاتەوە، خانمە رۆژنامەوانێك وتارێكی خۆی پەخش دەكات، خانمە پەرلەمانتارێك لەسەر پرسێكی نیشتمانی لێدوانێكی سیاسی دەدات، خانمێكی سترانبێژ گۆرانییەكی نوێی نماییش دەكات، خانمێكی هونەرمەندی كاری دەستی وێنەی بەرهەمێكی نوێی خۆی بڵاو دەكاتەوە، خانمێكی وەرزشوان ڤیدیۆی چالاكییەكی سەركەوتووی خۆی دادەنێ لە سۆشیال میدیادا، بەڵام كاتێ كۆمێنتی زۆرینەی پیاوانی كورد دەخوێنیتەوە، لەسەر ئەو كار و بەرهەمانە، لە سووكایەتی پێكردندا، هیچ جیاوازییەك لەنێوان ئەو ئافرەتانە و بۆ نموونە ئافرەتێكدا ناكەن كە سەرۆكی باندێكی لەشفرۆشیە، دیسان دەڵێم زۆرینەی كۆمێنتەكانی پیاوان نەك هەموویان.
كەواتە كێشە لە عەقڵی كۆمەڵگەدایە كە بوون و رۆڵی ئافرەتی پێ قه‌بووڵ نییە لە هیچ جێگەیەكدا، نەك كێشە لە هەموو ئافرەتانی كورد هەبێت، ئەو كۆمەڵگەیەی كە سەدان هێڵی سوور و سنووری بۆ چالاكیی ئافرەت داناوە و لە بەرامبەردا، هیچ سنوورێكی بۆ پیاو دانەڕشتووە لەڕووی جێندەرییەوە.