وه‌زاره‌تی پێشمه‌رگه: هاوپەیمانان هاوکاری لیواكان ده‌كه‌ن
K24- هه‌ولێر:
وه‌زاره‌تی پێشمه‌رگه‌ی حكومه‌تی هه‌رێمی كوردستان بڵاویكرده‌وه، بەسەرپەرشتی هێزه‌كانی هاوپەیمانان و ئامادەبوونی بەڕێوەبەری بەڕێوەبەرایەتی کاروباری پزیشکی گشتی و بەڕێوەبەری کۆگاکانی بەڕێوەبەرایەتی میرەی گشتی، هاوکاری تەندروستی بەسەر لیواکانی پێشمه‌رگه دابه‌شكرا.
وه‌زاره‌تی پێشمه‌رگه رایگه‌یاند، هاوکارییەکان پێکهاتبوون لە چەند جۆرێک جانتای فریاگوزاری بە شێوە و قەبارەی جیاواز، کە پێشمەرگەکان و یەکەکانی پزیشکی لیواکان، دەتوانن لە کاتی شەڕ و هەر ڕووداوێکی نەخوازراودا سوود لە کەلوپەلەکانی ناو ئەم جانتایانە وەرگرن.
راشیگه‌یاند، هاوکارییەکان چەند پێداویستیەکی دیكه‌ی پزیشکی لەخۆ دەگرێت، لەوانە (نه‌قالەی گواستنەوەی برینداران و جانتای کۆڵەپشتی فریاگوزاری سەرەتایی بەهەموو کەلوپەلێکی پێویستی پزیشکیەوە، بۆ ئەو شوێنانەی ئەمبۆلانسی پێ ناگات).
روونیكرده‌وه، ئەم هاوکاریانەی، کە دراون بەم هەشت لیوایە، بەشی یەکەمی کۆمەک و هاوکاریە تەندروستییەکانە بۆ لیواکانی وەزارەتی پێشمەرگە كه لە لایەن هاوپەیمانانەوە دابین كراون.
جه‌ختیكرده‌وه، لە هەفتەی داهاتوودا هەمان هاوکاری بەسەر گشت لیواکانی دیكه‌ی سەر بە وەزارەتی پێشمەرگە دابەشدەکرێن، بۆ ئەم مەبەستە، سوپای هاوپەیمانان لەگەڵ بەڕێوەبەرایەتی کاروباری پزیشکی گشتی و بەڕێوەبەرایەتی میرەی گشتی، لە پەیوەندی بەردەوام دان، بۆئەوەی لە داهاتوویەکی نزیکدا، هەر پێداویستیەک و کەم و کوڕیەک لە ناو هێزەکانی پێشمەرگەدا هەبێت، بۆیان دابین بکەن.