لەهی، گەندەلی و داعش..
ئێک ژ سەدەمێن دیرۆکی یێن خڕڤەبۆنا مرۆڤان ل دەورا ئێک، و دۆرستبۆنا گۆند و باژار و دەولەتان ل گۆرەی تیۆرێن سیاسی؛ مەرگەساتێن سرۆشتی بوونە. ژ هەمیا دیارتر رابوونا ئاڤێ ودۆرستبوونا لەهییان؛ ب تایبەتی ژی ل میزۆپۆتامیا و ل دۆڵا رۆبارێ نیل.
ئەڤە وێ رامانێ ددەت کۆ ل گەل هەبوونا مرۆڤایەتیێ، ترسا مرۆڤان ژ دیاردەێین سرۆشتی بوویە نەک یێن دەستکرد، و هەڤرکییا مرۆڤایەتی ل گەل سرۆشتی بوویە نە ل گەل مرۆڤان. ئەڤ هەڤرکییە هەتا ئەڤرۆ یا بەردەوامە. جار گەرما، و جار سەرما و جار لێمشت و جار هشکە ساڵی. هندەک جاران ژی گیانەوەران ئەڤ مەترسییە چێکریە. وەکوو کۆلی و سنکی؛ و چەندین جاران روودایە کۆ ژ ئەگەرێ سنک و کۆلی مللەت ب تەمامی ژ برسان ژناڤ چووینە!!!. مەبەست ژ ڤان گۆتنان ئەوە کۆ دیاردەیێن سرۆشتی هەبوونە و دێ هەبن. نە گرێدای چ حۆکمرانیا و دەستهەلاتانە چ یێن دەستهەلاتێن مۆنۆکرات، و ئەرستۆکرات ودیمۆکرات، یان یێن ئیمبراتۆریزم و جمهۆری؛ ئازاد و دیکتاتۆری!. هەمی پێکڤە تووشی ڤان کارەساتان بووینە. چونکە چاوانیا رەفتارێ لگەل سرۆشتی چ هەڤبەندی ب شێواز و رێکێن دەستهەلاتێڤە نینە. بەلکۆ روودانێن سرۆشتی رێکا ئێکانەیە کۆ هەموو مرۆڤ ل دەورا هەڤ خڕڤە ببن.
بێ گۆمان ئەوا ئەم بەحس دکەین ئەگەر ل سەر هەموو مللەتێن دۆنیایێ پراکتیزە ببیت، دێ بینین مللەتێ کۆرد بەرۆڤاژی! کا چاوا ل سەر هەموو تشتان د ناکۆکن دیسان سرۆشت ژی نەشێت وان ب کەتە ئێک! و ل گەل هەر روودانەکا سرۆشتی مخابن هەر ئێک ژ لایێ خۆ بزاڤێ دکەت کۆ بێخێتە د خزمەتا هزر ودیتنێن خۆ یێن بەرتەنگ دا. بێ کۆ هزر بکەن کا ئازارا ژ دەستدانا زارۆکەکێ ١٠ هەیڤێ چەندە بۆ بابەکی؛ کۆ ل پێشچاڤێن وی ئاڤ ببەت وباب یێ (لا حول ولا قوە) بیت!!! مللەتەکێ سەیرین نە خۆشی مە دکەنە ئێک و نە نەخۆشی! نە بەرفرەهی نە تەنگاڤی. خۆدی نەکەت وەسا بیت، بەلێ دیار ل گەل وێ رۆژا مە بریار دای کۆ کەو بۆ مە کۆردا سۆمبۆل بیت هەر وێ رۆژێ مەیا پشتراستکری کۆ مخابن هەتا ئەم هەبن دێ دۆژمنێن سەرێ خۆ بین!.
مەترسیێن دەستکرد ژ هەموو ئالییانڤە ئەم دۆرپێجکرینە، بەرێ دەمەکێ کۆرت ژ سەدەمێ هێرشێن هۆڤانەی یێن داعش، مە ئالا داگرن وتازی وماتەم دانا! ژ ئەنجامێ سەرەدەریا مە یا خەلەت د گەل سامان وسرۆشتی وەلاتێ هەموو رۆژێ مە ژڤانێ لگەل مەرگەساتەکێ هەی. لێ دیسان ئەم فێرە خۆ پاراستنێ نەبووین. ئەم فیرنەبووین کۆ ل تەنگاڤا ئێک بگرین وببینە پشت وپەنا بۆ ئێک، ل دەمەکێ کۆ ب هزاران سالا بەری ئەڤرۆ ل سەر ڤێ ئاخا ئەم ئەڤرۆ لێ دژین، د ڤان جۆرە کاودانان دا مرۆڤان ب تنێ ژبۆ مرۆڤایەتێ هەڤدەگرت و ل هەمبەر ڤان جۆرە مەترسییان د راوستیان!
گەلەگ یا سرۆشتی یە کۆ ئێک ژ سەدەمێن دۆرستبوونا ڤان مەترسییان دۆرستکریێن دەستێ مرۆڤان بن، مەزن دبێژن (ئەو جۆیا ئاڤ لێ چووی دێ هەر لێ چیت!) ژ بەر هندێ ئەگەر ل هندەک جها رێک ل جۆیان هاتبیتە گرتن ئەو سکر دێ بن ئاڤ بن وئاڤ دێ رێیا خۆ بڕیت. ئەو کەسێن جۆ گرتی دڤێت ژێ پرسێن ل گەل بهێتە کرن! سەرۆکێ حکۆمەتا هەرێما کۆردستانێ ژی هەر ئەڤە گۆت ( ئەوا د دەستی مە دا نە بێت وکارێ خۆدای بیت دڤێت شۆکری بین، وئەگەر کێمتر خەمی هاتبیتە کرن دڤێت ژێ پرسێن بهێتە کرن!). ئەز د وێ باوەرێ دامە هەر کەسەک ژی ل جهێ وان با دا هەر ڤێ کەت وبێژیت!!!.
ل ڤێ وەلاتێ ل چاڤ وەلاتان گەلەگ بچووک ب هەموو رەنگا مەترسی رووی تێدکەن. جار ب دەست وجار بێ دەست. ئەوا نۆکە دهێتە دیتن خەمخۆری ودلپێڤەبۆنەکا گەلەگ مەزن پێڤە دیارە. ئەڤە بۆ جارا دووی یە ئەم دبینین زمانێ جەستەیێ سەرۆکێ حکۆمەتێ وێ راستێ بۆ مە دیار دکەت کۆ ئەڤرۆ پتر ژ هەر وەختەکی رەوش و ژیانا تاکێن ڤێ مللەتی ل پێش چاڤ دهێتە وەرگرتن. ب ئێش و ئازارێن خەلکێ خەمگینی دگریت و ب خۆشیا وان دلخۆش دبیت. بەرێ چەندەکێ ب کێمتر ژ ٢٤ دەمژمێران دناڤ ئازارێن مللەتی خۆدا بوو، و ڤێ جارێ ب کێمتر ژ ١٢ دەمژمێران دگەل خەلکێ خۆ بوو. دوور ژ هەر تشتەکێ ئەڤە ئاماژەکا دلخۆشکەرە کۆ ئەم هەمێ ل بەرچاڤ بگرین وهەستێ هەبۆنا گۆهرینێن گەوهەری بدەتە مە. و بۆ مە دیار ببیت کۆ ئالایەک هاتیە بلند کرن ل هەمبەر هەموو ئەو نەخۆشیێن مللەت تووش دبیت چ لەهی بن، یان گەندلی یان ژی داعش.