لەبارەی گەشتکردنی هاووڵاتییان بۆ ئێران بڕیارێکی نوێ دەدرێت
K24 - هەولێر:
دەروازەی نێودەوڵەتی باشماخ هاووڵاتیان ئاگادار دەکاتەوە، کە لە ئەمڕۆوە دەتوانن بە ڤیزای گەشتیاری سەردانی ئێران بکەن.
دەروازەی نێودەوڵەتی باشماخ رایگەیاند، هاووڵاتیانی هەرێمی کوردستان لەئەمڕۆ رێکەوتی 12ـی کانوونی دووەم/یەنایری 2022 هەڵگرانی ڤیزای جۆری گەشتیاری دەتوانن لەڕێگەی دەروازەی باشماخەوە گەشتی کۆماری ئیسلامی ئێران بکەن ( بە جێ بەجێ کردنی پڕۆتۆکۆڵ و ڕێنمایی یە تەندروستی یەکان).
پاش ئەوەی لە ڕێکەوتی 25ـی کانوونی یەکەم/یەنایری 2021 بەبڕیاری کۆماری ئیسلامی ئێران قەدەغەی گەشت کردنی هاووڵاتیانی هەرێمی کوردستان بە ڤیزای گەشتیاری راگەیەندرا، ئەمڕۆ لەلایەن کونسوڵگەری کۆماری ئیسلامی ئێران لە سلێمانی، بەفەرمی هەڵوەشاندنەوەی ئەو بڕیارەمان پێ راگەیەندرا و هەروەک ئاماژەیاندا لەئەمڕۆوە هاووڵاتیانی هەرێمی کوردستان دەتوانن داواکاری وەرگرتنی ڤیزای گەشتیاری لە کونسوڵگەری کۆماری ئیسلامی ئێران بکەن و بەدەستی بهێنن.
H.H