ئامادەکاری بۆ وەرگرتنی گەنمی جووتیاران دەکرێت
K24 – هه‌ولێر:
وه‌زاره‌تی كشتوكاڵ و سه‌رچاوه‌كانی ئاو ئامادەکاری بۆ چۆنیەتی وەرگرتنی گەنمی جووتیاران لە سایلۆکان ده‌كات.
وه‌زاره‌تی كشتوكاڵ و سه‌رچاوه‌كانی ئاو راگه‌یه‌ندراوێكی بڵاوكرده‌وه، تێیدا هاتووه، بەسەرپەرشتی کەریم سلێمان، بریکاری وەزارەت و بە ئامادەبوونی راوێژکاری وەزارەت و بەڕێوەبەرانی گشتی کشتوکاڵی پارێزگاکان و ئیدارەی گەرمیان، بۆ پشتگیریكردن لە جووتیاران و دانانی میکانیزمەکانی فۆرمی داتا و زانیاری بۆ گەنمی داچێنراو، ئه‌مڕۆ 31ـی كانوونی دووه‌م / یه‌نایه‌ری 2022 كۆبوونه‌وه‌یه‌ك به‌ڕێوه‌چوو.
وه‌زاره‌تی كشتوكاڵ راشیگه‌یاند، بە مەبەستی ئامادەکاری و وەرگرتنەوەی بری گەنمی بەرهەم هاتووی ناوخۆی جووتیارانی هەرێمی کوردستان، بڕیاردرا کۆبوونەوەیەک لەگەڵ هەردوو کۆمپانیای جێبەجێکاری پڕۆژەی بەبازاڕکردنی گەنمی جووتیاران (قەیوان و خۆشناو) بکرێت، بۆ ئەوەی لە دەرەوەی سایلۆکانی عێراق بەبازاڕکردن و ساغکردنەوەی بۆ بکرێت.
