یانەی هەولێر: رێگریمان لە بەرزکردنەوەی ئاڵای کوردستان نەکردووە

لە یاریی بەرامبەر شوڕتە کە دوای نزیکەی 10 ساڵ زیاتر لە 15 هەزار هاندەری هەولێر لە یاریگەی فڕەنسۆ هەریری ئامادەبوون، لە تۆڕە کۆمەڵایەتییەکان دەنگۆی ئەوە بڵاوبووەتەوە کە لە یارییەکە بەرزکردنەوەی ئاڵای کوردستان قەدەخە کراوە.

بەرپرسێکی یانەی هەولێر لە لێدوانێکی بۆ کوردستان24 رایگەیاند 'بەهیچ شێوەیەک ئێمە بەرزکردنەوەی ئاڵای کوردستانمان لە یارییەکەی شوڕتە قەدەخە نەکردبوو، بەداخەوە پڕوپاگەندەی ئەوە دەکرێت کە یانەی هەولێر بە بڕیاری فیدراسیۆنی تۆپی پێی عێراق رێگریمان لە بردنەوە ژوورەوەی ئاڵای کوردستان کردبێت بۆ ناو یاریگە'.

بەرپرسەکەی یانەی هەولێر گوتیشی 'ئێمە تەنیا پێشوەختە رێگریمان لەوە کردبوو ئاڵای عێراق لەلایەن هاندەرانی یانەی شوڕتەوە نەبردرێتە ناو یاریگە، بۆ ئەوەی گرژی و ئاڵۆزییەکانی یاریی رابردوومان دووبارە نەبێتەوە و هیچ پێکدادانێکیش لە نێوان هاندەرانی شوڕتە و هاندەرانی یانەکەمان روونەدات'.

لە کاتی بەڕێوەچوونی یارییەکە بەشێک لە هاندەرانی یانەی هەولێر ئاڵای کوردستانیان لەناو یاریگە بەرزکردبووەوە، وەکو پڕۆتۆکۆڵی یاریگەی فڕەنسۆ هەریریش ئاڵای کوردستان و عێراق لە پاڵ ئاڵای یانەی هەولێر بەرزکرابوونەوە.