لە شەڕی رووسیا و ئۆکرانیا 12 رۆژنامەنووس کوژراون
K24 - هەولێر
بەگوێرەی ئامارەکان تائێستا لە جەنگی نێوان رووسیا و ئۆکرانیا 12 رۆژنامەنووس کوژراون.
ئایرینا ڤێندێکتۆڤا، داواکاری گشتی ئۆکرانیا لە تۆڕی کۆڵامەیەتی فەیسبووک بڵاویکردووەتەوە، لە سەرەتای هێرشەکانی سوپای رووسیا بۆ سەر وڵاتەکەی تاکوو ئێستا 12 رۆژنامەنووس کوژراون و 10 رۆژنامەنووسی دیکەش برینداربوون، کە دوو لە بریندارەکان هەڵگری رەگەزنامەی ئیماراتن.
هەروەها ئاماژەیداوە، 56 کەس لە ئەندامانی تیمە میدیاییەکانی رووماڵی جەنگ لە ئۆکرانیا دەکەن، کەوتوونەتە بەر هێرش و پەلاماردان، لە نێویاندا 15 کەسی بیانی هەن، کە خەڵکی وڵاتانی سویسرا، دانیمارک، چیک، بەریتانیا، ئیمارات و ئەمەریکان.
هێرشی رووسیا بۆ سەر ئۆکرانیا لە 24/2/2022، دەستیپێکردووە، بووەتە هەواڵی سەرەکی رۆژانەی میدیاکان.