باڵیۆزی ئه‌مه‌ریكا نامه‌یه‌كی بایدن ده‌گه‌یه‌نێته نێچیرڤان بارزانی
K24 - هه‌ولێر:
نێچيرڤان بارزانى، سه‌رۆكى هه‌رێمى كوردستان، ئه‌مڕۆ چوارشه‌ممه (30ی ئادار/ مارسی 2022) پێشوازى له ماتيو توله‌ر، باڵيۆزى ئه‌مه‌ريكا له عێراق كرد.
له كۆبوونه‌وه‌يه‌كدا باڵيۆزى ئه‌مه‌ريكا نامه‌يه‌كى جۆو بايدن، سه‌رۆكى وڵاته يه‌كگرتووه‌كانى ئه‌مه‌ريكاى گه‌يانده نێچيرڤان بارزانى، كه تيايدا جه‌خت له پشتگيريى ئه‌مه‌ريكا بۆ عێراق و هه‌رێمى كوردستان كراوه‌ته‌وه.
هه‌ردوولا دۆخى سياسيى عێراق، هه‌نگاوه‌كانى پرۆسه‌ى سياسى و كۆبوونه‌وه‌كانى ئه‌نجومه‌نى نوێنه‌رانى عێراق، دۆخى هه‌رێمى كوردستان و پرۆسه‌ى هه‌ڵبژاردنه‌كانى داهاتووى هه‌رێمى كوردستان، په‌يوه‌ندييه‌كانى هه‌ولێر ـ به‌غدا و پێشنبينييه‌كانيان بۆ داهاتووى پرۆسه‌ى سياسييان له وڵات تاوتوێ كرد.
له كۆبوونه‌وه‌كه‌دا هه‌ردوولا هاوڕا بوون له‌سه‌ر پێويستيى هه‌بوونى سيسمێكى حوكمڕانيى ته‌ندروست له عێراق له‌سه‌ر بنه‌ماى متمانه و هاوبه‌شيى راسته‌قينه و پابه‌نديى به ده‌ستوور و بنه‌ماكانييه‌وه، كه ته‌نيا رێگه‌يه بۆ ئارامى و سه‌قامگيرى و جه‌ختيان له گرنگيى بنياتنانى متمانه و لێكگه‌يشتنى هاوبه‌شى نێوان لايه‌نه عێراقييه‌كان بۆ تێپه‌ڕاندنى دۆخه‌كه و چاره‌سه‌ركردنى كێشه‌كان كرده‌وه.
گفتوگۆى لايه‌نه‌كان له‌سه‌ر ياساى هه‌ڵبژاردن له هه‌رێمى كوردستان، گرنگيى يه‌كڕيزيى لايه‌نه كوردستانييه‌كان له به‌غدا و كارى پێكه‌وه‌يى له‌گه‌ڵ لايه‌نه عێراقييه‌كان، گرنگيى به‌رده‌واميى گفتوگۆى هه‌ولێر ـ به‌غدا بۆ چاره‌سه‌ركردنى كێشه‌كان، په‌يوه‌ندييه‌كانى هه‌رێمى كوردستان و عێراق له‌گه‌ڵ وڵاتانى ناوچه‌كه، شه‌ڕ و دۆخى ئۆكرانیا و كاريگه‌رييه‌كانى و وتووێژى ڤيه‌ننا له‌سه‌ر دۆسيه‌ى ئه‌تۆمى، چه‌ند ته‌وه‌رێكى ديكه‌ى كۆبوونه‌وه‌كه بوون كه كونسوڵى گشتيى ئه‌مه‌ريكا له هه‌رێمى كوردستان ئاماده‌ى بوو.
