وەزارەتی پێشمەرگە: هیچ لیستێکی جیاکاری شەهیدان و لایەنی سیاسیمان بڵاونەکردووه‌تەوە
K24 - هه‌ولێر:
وەزارەتی پێشمەرگە له راگەیندراوێكدا ده‌نگۆی بڵاوبوونه‌وه‌ی لیستێكی شه‌هیدانی ره‌تكرده‌وه و ئاشكرای كرد، بەهیچ جۆرێک پۆلبەندی و ریزبەندی شەهیدانی سەربەرزی دژ بە داعش بەرەسمی نەکراوە.
له راگه‌یه‌ندراوه‌كه‌ی وه‌زاره‌تی پێشمه‌رگه‌دا هاتووه: بە رای گشتی و پێشمەرگە قارەمانەکان و میدیاکاران رادەگەینین، وەزارەتی پێشمەرگە، هیچ لیستێکی جیاکاری شەهیدان و لایەنی سیاسیان بڵاو نەکردووه‌تەوە و بە هیچ جۆرێک پۆلبەندی و ریزبەندی شەهیدانی سەربەرزی دژ بە داعش بەرەسمی نەکراوە.
ئاماژه به‌وه‌ش كراوه، نە لەرابردوو نە لە ئێستا و داهاتوو نەبووە و نابێت، هەر لیست و جیاکارییەک لەوبارەیەوە بەناوی ئەمینداری گشتیی و وەزارەتی پێشمەرگە بڵاوکراوەتەوە، ساختەیە و ناحەقیشە بەرامبەر بەخوێنی شەهیدانمان. لەوبارەیەشەوە، چەواشەکاران و ساختەکاران دەدەین بە یاسا و رووبەڕووی دادگایان دەکەینەوە.
وەزارەتی پێشمەرگە جه‌ختی له‌وه كرده‌وه، "شەهیدانمان بەیەکەوە لە سەنگەری بەرگری خاکی کوردستان و کەرامەتی تاک بەتاکی گەلەکەمان و پاراستنی ئەزموونی هەرێم و ئاشتی بۆ جیهان گیانیان بەخشیوە، بۆیە لە لای ئێمە شەهیدان شەهیدی ئاڵا و خاکی پیرۆزی کوردستانن".