دوای سەربڕینی هاووڵاتییەك ئاڵاكەشیان هەڵكردووە
K24 - کەرکووک:
بەرەبەیانی ئەمڕۆ یەکشەممە 1ـی ئایاری 2022، چەكدارانی داعش لە سنووری شارەدێی پردێ هاووڵاتییەكی عەرەبیان بەناوی حامد عەواد سەربڕی.
بە گوێرەی ئەو زانیاریانەی دەست کوردستان24 کەوتووە، ڕووداوەكە لە بەرەبەیانی ئەمڕۆ لە نێوان گوندی زەردك و بیبانی و كەڵوڕی سەربە پردێ ڕوویداوە.
سەرچاوەیەك لە پۆلیسی پردێ بەكوردستان24ـی ڕاگەیاند، لە كامێرای چاودێری چوار چەكداری داعش دەركەوتوون و هەڵدەكووتنە سەر كێڵگەیەك كە موڵكی هاووڵاتییەكی كوردە، لەو کێڵگەیەش خانەوادەیەكی عەرەب چەند ساڵێكە لەوێ وەك پاسەوان كاری تێدادەكەن، دوای قۆڵبەستكردنی پاسەوانی كێڵگەكە، چەکادارانی داعش سەری دەبڕن.
کوژراوەکە هاووڵاتییەكی عەرەبی سوننەیە و زانییارییەكان باس لەوە دەكەن كە ماوەیەكە لە ڕیزەكانی حەشدی شەعبییە.
هەمان سەرچاوە ڕاشیگەیاند، هەر لە بەرەبەیانی ئەمڕۆ لە بەرزاییەکی سنووری گوندی كارێز ئاڵای داعش هەڵكراوە و دوای ئاگاداركردنەوەی هێزە ئەمنییەكان ئاڵاكە هەڵگیراوەتەوە.
هاوكات چەند هاووڵاتییەكی ئەو گوندانە بەكوردستان24یان ڕاگەیاند، پێشتریش چەكدارانی داعش لە سنوورەكە جموجۆڵیان هەبووە و چەندین جاریش هۆشدارییان داوە.
هاووڵاتییان باس لەوەش دەکەن، گرفتی ئەمنی ناوچەکە بەبێ چارەسەر ماوەتەوە و دوای ئەم ڕووداوەش ترس و دڵەڕاوكێ لەنێو هاووڵاتیان دروست بووە و داوای جێگیركردنی هێزی پێشمەرگە دەكەن.