نێچيرڤان بارزانى: ناوبانگی نازری بۆ ههموو كوردێك مایهی شانازییه
K24 – ههولێر:
نێچيرڤان بارزانى، سهرۆكى ههرێمى كوردستان، ئهمڕۆ چوارشهممه پێشوازى له هونهرمهندى كورد شههرامى نازرى كرد كه ماوهيهكه به سهردان له ههرێمى كوردستانه و رۆژی دووشهممه له رێوڕهسمێكى رێزلێناندا خهڵاتى ئاڵتوونيى وهزارهتى رۆشنبيری حكوومهتى ههرێمى كوردستانى پێ بهخشرا.
نێچيرڤان بارزانى، وێڕاى دهربڕينى خۆشحاڵى به ديدارى نازرى، رێز و ستايش و پێزانينى بۆ مێژوو و خزمهت و كار و بهرههمه هونهرييهكانى دووپات كردهوه و پێگه و ناوبانگى نازرى لهسهر ئاستى ناوچهكه و جيهان و ئهو خهڵاته نێودهوڵهتييانهى به دهستى هێناون، به مايهى شانازى بۆ ههموو كوردێك و خهڵكى كوردستان بهگشتى له قهڵهم دا. وێڕاى دووپاتكردنهوهى ههموو پشتگيرييهك بۆ نازرى، هيواى تهمهنى درێژ و تهندروستيى باش و سهركهوتنى بهردهوامى بۆ خواست.
لاى خۆيهوه شههرامى نازرى وێڕاى سوپاس و پێزانين بۆ نێچيرڤان بارزانى و ئهو رێزلێنان و خهڵاتكردنهى له ههرێمى كوردستان لێى كراوه، دووپاتى كردهوه كه رێزلێنان و خهڵاتكردنى له كوردستان، لاى ئهو له ههموو ئهو رێزلێنان و خهڵاته نێودهوڵهتييانه زياتر مايهى شادى و مانادارتر و بههادارتره كه لهسهر ئاستى جيهان پێشكهشى كراون و خۆشحاڵيى خۆى به سهردانى ههرێمى كوردستان و ديدارى لهگهڵ نێچيرڤان بارزانى پيشان دا.
له ديدارهكهدا ههریهك له وهزيرى رۆشنبيرى و بريكارى وهزارهتى رۆشنبيريى حكوومهتى ههرێمى كوردستان، ئاماده بوون.