ئەیاد عەلاوی: لە دەرەوەی باڵەخانەی پەرلەمان کۆبوونەوەی ئەنجومەنی نوێنەران بکەن
K24 - هەولێر:
ئەیاد عەللاوی، سەرۆکی هاوپەیمانی نیشتمانی پێشنیازی کۆبوونەوەی پەرلەمان لە دەرەوەی باڵەخانەی پەرلەمان بۆ هەڵبژاردنی سەرۆککۆمار و پێکهێنانی حکومەتی نوێ دەکات.
سەرۆکی هاوپەیمانی نیشتمانی لە راگەیاندراوێکدا پێشنیازی کردووە، "بۆ هەڵبژاردنی سەرۆککۆمار و پێکهێنانی حکومەتی نوێ وەك ئامادەکارییەک بۆ هەڵبژاردنی پێشوەختە، کۆبوونەوەی ئەنجومەنی نوێنەران بە ئامادەبوونی سەرۆکی ئەنجومەنی باڵای دادوەری و سەرۆکی دادگای فیدراڵی، لە دەرەوەی باڵەخانەی پەرلەمان بکرێ".
عەللاوی راشیگەیاندووە لە ساڵی 2010ـەوە داوای پێکهێنانی ئەنجومەنی باڵای سیاسەتی ستراتیژی بۆ چارەسەرکردنی کێشەکان و کۆتاییهێنان بە ئاڵۆزییەکان دەکات، بەڵام تا ئێستا لایەنە ناکۆکەکان بەدەم داواکەی نەهاتوون و هۆشداریشی لە تێکچوونی دۆخەکە و مەترسی قۆناغی ئێستای عێراق داوە.