وەزیری رۆشنبیری: کارێک ناکەم ئازادی کۆتوبەند بکرێت و دژی هەواڵی درۆم
K24 - سلێمانی:
وەزیری رۆشنبیری حکومەتی هەرێمی کوردستان رایگەیاند، لەماوەی بەرپرسیارێتیدا، کارێک ناکات لە رێنماییەکانی وەزارەتەکەیدا، ئازادی کۆتوبەند بکرێت و سانسۆر بخرێتە سەر ئەو بەرهەمانەی ژمارەی سپاردنیان پێدەدرێت.
حەمەی حەمە سەعید، وەزیری رۆشنبیری حکومەتی هەرێمی کوردستان، ئەمڕۆ (22ی ئابی 2022) لە شاری سلێمانی، سەردانی سەنتەری میترۆی کرد و بەگوێرەی راگەیەندراوی سەنتەرەکە گوتوویەتی "خەباتی من بۆ ئازادی بووە، لە ماوەی بەرپرسیارێتیم لە وەزارەت كارێك ناكەم لە رێنماییەكاندا ئازادی كۆتوبەند بكرێت و سانسۆر بخرێتە سەر ئەو بەرهەمانەی ژماری سپاردنی پێدەدەین".
.jpeg)
وەزیری رۆشنبیری، پشتیوانی خۆی بۆ هەڵمەتی سەنتەری میترۆ بۆ دژایەتیکردنی هەواڵی چەواشەکاری و ناڕاست دەربڕیوە و باسی لەوەکردوە، کە "پرۆژەیەكمان هەیە بە ناوی (رێكخستنی فریكوێنسی) كە هەمواركردنی رێنمایی ژمارە یەكی ساڵی 2014 یە و رێنمایی دەردەکات بۆ كاری میدیای، كە پشت ئەستوورە بە یاسای رۆژنامەگەری لە هەرێمی كوردستان".
هەروەها رەحمان غەریب، رێکخەری سەنتەری میترۆ ئاماژەی بەوەکردوە، بۆ هەڵمەتی بەرزکردنەوەی ئاستی هۆشیاری لە دژی بڵاوکردنەوەی زانیاری ناڕاست و پشتیوانی وەزارەتەکەیان دەوێت و بۆ پرۆژەی رێکخستنی میدیای ئەلکترۆنی زانیارییان دەوێت.
سه‌نته‌ری میترۆ له مانگی ئابی 2009، به هاوكاری رێكخراوی په‌یمانگای رۆژنامه‌نووسانی جه‌نگ و ئاشتی دامه‌زرا و بەرگری لە ئازادی کاری رۆژنامەنووسی دەکات، لەماوەی دوو مانگی رابردووشدا، چەند چالاکییەکیان لە هەرێمی کوردستان، بۆ هۆشیارکردنەوەی رۆژنامەنووسان لە هەواڵی ناڕاست ئەنجامداوە، لە ژێر ناونیشانی هەڵمەتی دژە چەواشەدا.