تۆپخانەكانی ئێران دەوروبەری حاجی ئۆمەران و سیدەكان تۆپباران دەكەن
K24 - سۆران
پەیامنێری كوردستان24 لە ناوچەكە رایگەیاند: "تۆپخانەكانی ئێران ناوچەی دۆڵ ئاڵانە لە دەوروبەری حاجی ئۆمەران تۆپباران دەكەن، ھەروەھا لە سنووری شارەدێی سیدەكان ناوچەكانی بەربزین و دەرھۆڵ و گوندەكانی كەتینە و بێركم، بە خەستی بۆردوومان دەكەن".
پەیامنێرمان راشیگەیاند: "زۆر لە گوندنشینانی ئەو ناوچانە بەھۆی تۆپبارانەوە گوندەكانیان جێھێشووە و ئاگرێكی گەورە لە ناوچە كوێستانیەكان كەوتووەتەوە".
پێشتر كوردستان24 لە رێگەی چەند سەرچاوە و بڵاوكردنەوەی وێنەی بنكە و بارەگاكانی ھێزەكانی ئێران لە ناوچە سنوورییەكان ئەوەی ئاشكرای كردبوو كە ئێران ھێزێكی زۆری لەو سنوورانە كۆكردوەتەوە.