دادگای دهۆك بڕیاری كۆتایی له‌باره‌ی بكوژی ئاخینك و فاروقی باوكی ده‌ركرد
K24 - هه‌ولێر:
دادگای تاوانه‌كانی دهۆك بڕیاری له‌سێداره‌دان تا مردن بۆ بكوژی ئاخینكی شه‌ش ساڵان و فاروقی باوكی ده‌ركرد.
ئه‌مڕۆ چوارشه‌ممه 5ـی ئۆكتۆبه‌ری 2022، دادگای تاوانه‌كانی دهۆك بڕیاری له‌سێداره‌دانی بۆ بكوژی ئاخینكی شه‌ش ساڵان و فاروقی باوكی ده‌ركرد.
رۆژی پێنجشەممە 4ـی ئابی 2022، فارووق میرزا و (ئاخینک)ـی کچی لەلایەن كه‌سێكه‌وه به‌ناوی (ب.د.س) له گوندێكی سنووری زاخۆ داوه‌تی نانی ئێواران ده‌كرێن، لەهەمان رۆژدا ئه‌و كه‌سه فاروق میرزا و کچەکەی ده‌كوژێت، دوای پێنج رۆژ لە رووداوەکە تەرمی فاروق میرزا لە نزیك باخی خانووی بكوژه‌كه دۆزرایەوە. دوای هه‌فته‌یه‌كیش له دۆزینه‌وه‌ی ته‌رمی فاروف میرزا، رۆژی دووشه‌ممه 12ـی ئابی 2022، ته‌رمی ئاخینكی شه‌ش ساڵان له نزیك خانووی بكوژه‌كه دۆزرایه‌وه.
بکوژەکە پێشتر تاوانی کوشتنی ئەنجامداوە و دوای ٣ ساڵ ئازادکراوە، بەگوێرەی زانیارییەکانی كوردستان24 لە ساڵی 2021 بکوژه‌كه بە تۆمەتی رفاندنی دوو کچە منداڵی پەنابەری رۆژئاوای کوردستان دەستگیرکرابوو، دوای ئەوەی لە کامێراکانی چاودێرییەوە دەرکەوتبوو دوو منداڵەکە دەباتە دەرەوەی شار، بەڵام بەهۆی نەبوونی بەڵگەی پێویست ئەوکات دادگا بکووژەکەی ئازادکرد، تا ئێستاش چارەنووسی ئەو دوو منداڵە نادیارە.