ریشی سوناك خۆی بۆ پۆستی سەرۆکوەزیرانی بەریتانیا کاندید دەکات
K24 - هەولێر:
ریشی سوناك، ئەندامی پارتی پارێزگارانی بەریتانیا رایگەیاند، خۆی بۆ پۆستی سەرۆکوەزیران کاندید دەکات.
پاش دەستلەکارکێشانەوەی لیز ترەس لە پۆستی سەرۆکوەزیرانی بەریتانیا و سەرۆکی پارتی پارێزگاران، ئەمڕۆ یەکشەممە (23ـی تشرینی یه‌كه‌م/ئۆكتۆبه‌ری 2022) ریشی سوناك، وەزیری دارایی کابینەی بۆریس جۆنسۆن رایگەیاند، خۆی بۆ پۆستی سەرۆک وەزیران کاندید دەکات.
ریشی سوناك لە تویتێکدا گوتی" شانشینی یەکگرتوو وڵاتێكی مەزنە، بەڵام ئێمە رووبەڕووی قەیرانێکی ئابووری قووڵ دەبینەوە، من دەمەوێت ئابووریەکەمان چاکبکەمەوە و، پارتەکەمان یەکبخەم و داواکارییەکانی خەڵکەکەمان جێبەجێبکەین".
رۆژی 5ـی ئەیلوولـی 2022، ئەندامانی پارتی پارێزگارانی بەریتانیا، (لیز ترەس)ـیان بە سەرۆکی نوێی حزبەکەیان هەڵبژارد. بەپێی سیستەمی سیاسیی بەریتانیا، سەرۆکی حزبی براوەی هەڵبژاردنی پەرلەمانی، دەبێتە سەرۆکوەزیرانی وڵات، دواتر لیز ترەس لە رۆژی 20ـی تشرینی یەکەم دەستلەکارکێشانەوەی خۆی راگەیاند.