هه‌ولێر.. سه‌رۆكی هه‌رێمی كوردستان بەردی بناغەی پەیمانگه‌ی كولتووريی فەرەنسی ـ ئەڵمانی دانا
K24 - هه‌ولێر:
سەرۆكی هه‌رێمی كوردستان بەردی بناغەی پەیمانگه‌يه‌كى كولتووريی فەرەنسی ـ ئەڵمانی له هه‌ولێر دانا.
ئه‌مڕۆ (یه‌كشه‌ممه 22ـی كانوونی دووه‌م/ یه‌نایه‌ری 2023)، ماڵپه‌ڕی سه‌رۆكایه‌تی هه‌رێمی كوردستان راگه‌یه‌ندراوێكی بڵاوكرده‌وه، تێیدا هاتووه: نێچیرڤان بارزانی سه‌رۆكی هه‌رێمی كوردستان، به‌ئاماده‌بوونی هەریەك لە ئيريك شۆڤاليێ باڵيۆزى فه‌ره‌نسا، مارتين يێگه‌ر باڵيۆزى ئه‌ڵمانيا له عێراق، كونسوڵانی هەردوو وڵات لە هەولێر و ژماره‌یه‌ك به‌رپرسی حكومه‌تی هه‌رێمی كوردستان، لەسەر قەڵای هەولێر، بەردی بناغەی په‌يمانگه‌ى داهاتووى كولتووريى هاوبه‌شى فه‌ره‌نسى ـ ئه‌ڵمانى دانا.
لە میانه‌ی گوتارێكدا نێچیرڤان بارزانی رایگه‌یاند، ئەم پەیمانگەیە دەبێتە پردێكی دیكەی دۆستایەتيی نێوان هەرێمی كوردستان و ئەڵمانیا و فەرەنسا.