وەزارەتی گواستنەوە و گەیاندن: کۆتاییهاتنی بوومەلەرزەکە بە مانای کۆتاییهاتنی مەترسییەکە نییە
K24 - هەولێر:
وەزارەتی گواستنەوە و گەیاندنی حکومەتی هەرێمی کوردستان دوای زنجیرە بومەلەرزەکەی تورکیا و باکووری کوردستان چەند رێنماییەکی بڵاوکردەوە و رایگەیاند، کۆتاییهاتنی بوومەلەرزەکە بە مانای کۆتاییهاتنی مەترسییەکە نییە.
بە گوێرەی راگەیەندراوەکەی وەزارەتی گواستنەوە و گەیاندن، کۆتاییهاتنی بوومەلەرزەکە بە مانای کۆتاییهاتنی مەترسییەکە نییە، بەو پێیەی دواتر بوومەلەرزەی پاشماوەی بە توندی کەمتر بەدوای خۆیدا هێنا، یان رەنگە ئەم بوومەلەرزە بوومەلەرزە سەرەکییە وێرانکەرە نەبێت کە لە کاتێکی دواتردا دێت، ئەمەش باشترین هۆیە کە پابەند بیت بە رێنماییەکانی دەسەڵاتە پەیوەندیدارەکان و ئارامگرتن و ڕێگەدان بە تیمەکانی بەرگری شارستانی بۆ گرتنەبەری ڕێکاری پێویست.
رێنماییەکانی وەزارەتی گواستنەوە و گەیاندن بۆ کاتی روودانی بومەلەرزە، لە باڵەخانەکاندا:
1- کاتێک هەست بە بوومەلەرزە دەکەیت لەکاتێکدا لەناو ژوورێک یان باڵەخانەیەکی بەرزدایت، پەنا ببە بۆ ژێر پارچە مۆبیلیاتێکی ئەستوور یان پتەو.
2- ئەگەر ناتوانی خۆت بشاریتەوە، خۆت لە گۆشەیەکی ژوورەکەدا بچەسپێنە و هەوڵبدە لە پەنجەرەکان دوور بکەویتەوە.
3- ئاگاداری کەوتنی سەقف و هەڵواسینی دیوار بن.
4- ئاگاداری ئەو شتابەبن کە لە رەفە بەرزەکاندا دانراون و رەنگە بکەونە خوارەوە.
5. ئاگاداری داڕمانی سەقفی لاوەکی بن.
6- هەوڵبدە هەندێک شتی پارێزەر بخەیتە سەر سەرت.
7- ئاگاداری رۆیشتن بن لەسەر پردە هەڵواسراوەکان کە بیناکان بەیەکەوە دەبەستنەوە.
8- خۆبەدوورگرتن لە بەکارهێنانی بەرزکەرەوە و باشترە قادرمە بەکاربهێنرێت لە پرۆسەی چۆڵکردندا.
9- نەگەڕانەوە بۆ ناو باڵەخانەکان دوای تێپەڕبوونی بوومەلەرزەکە، مەگەر دوای دڵنیابوون لە سەلامەتی باڵەخانەکان.
رێنماییەکانی وەزارەتی گواستنەوە و گەیاندن بۆ کاتی روودانی بومەلەرزە، لە ماڵەکاندا:
1- لە ماڵەوە دەربچن.
2- ئەگەر ناتوانی بچیتە دەرەوە هەوڵبدە بە پارچە مۆبیلیاتە گەورە و بەهێزەکان خۆت داپۆشیت.
3- بە گۆشەیەکی ژوورەکە یان دیوارەکانەوە خۆت بپارێزە و هەوڵبدە لە پەنجەرەکان دوور بکەویتەوە.
4- دوور بکەوەرەوە لە کەوتنی سەقف وکەلوپەل.
5- دوور بکەوەرەوە لە کەوتنە خوارەوەی کەرەستە لە ڕەفەکان.
6- ئاگاداری کەوتنی سەقفی لاوەکی بن.
7- هەوڵبدە هەندێک شتی پارێزەر بخەیتە سەر سەرت .
8- نەگەڕانەوە بۆ ناو باڵەخانەکان دوای تێپەڕبوونی بوومەلەرزەکە، مەگەر دوای دڵنیابوون لە سەلامەتی باڵەخانەکان.
بەرە بەیانی ئەمڕۆ دووشەممە 6ـی شوباتی 2023، بومەلەرزەیەک بە گوڕی 7.8 پلەی رێختەر 10 شاری تورکیا و باکووری کوردستانی هەژاند، دواتریش نزیکەی 50 پاشلەرزە روویاندا، کە بەهۆیانەوە زیاتر لە 70 کەس لەو شارانە گیانیان لەدەستدا و سەدان کەسی دیکەش برینداربوون.
بومەلەرزەی سەرەتا لە هەردوو پارێزگای دهۆک و هەولێر هەستی پێکرا و، بەشێك لە هاووڵاتیان لەترسی دووبارەبوونەوەی بومەلەرزە لە ماڵەکانیان چوونە دەرەوە.
زنجیرە بومەلەرزەکەی تورکیا و باکووری کوردستان، باکووری سووریاشی گرتەوە، وەزارەتی تەندروستی سووریا لەوبارەیەوە رایگەیاند، لانیکەم 111 کەس لە ناوچەکانی ژێر دەسەڵاتی حکومەت لە سووریا گیانیان لەدەستداوە.