دوای 35 ساڵ دەروازەی سنووری نێوان تورکیا و ئەرمینیا کرایەوە
K24 - هەولێر
لە دوای 35 ساڵ دەروازەی سنووری نێوان تورکیا و ئەرمینیا بۆ گەیاندنی هاوکاری مرۆیی کرایەوە.
دەروازەی سنووری ئالیجان کە دەکەوێتە نێوان ئەرمینیا و پارێزگای ئیدری تورکیا، لە دوای 35 ساڵ لە داخرانی، بۆ گەیاندنی هاوکاری مرۆیی بە لێقەوماوانی بوومەلەرزەکان، کرایەوە.
لە دوای بوومەلەرزەکانی 6ی شوباتی 2023ی تورکیا و سووریا هاتنی هاوکاری مرۆیی لە وڵاتانی دراوسێی تورکیاوە بەردەوامن. پێنج بارهەڵگر هاوکاری مرۆیی کە لە ئەرمینیاوه بۆ لێقەوماوانی بوومەلەرزەکان ئامادە کرابوون، گەیەندرایە سەر پردی ئالیجان لەسەر سنووری نێوان ئەرمینیا و تورکیا.
بورهان چۆللو، بەڕێوبەری لقی پارێزگای ئیدری سه‌رۆكایه‌تی ئیداره‌دانی كاره‌سات و باری له‌ناكاو، و بەرپرسانی سەربازیی تورکیا، پێشوازییان لە شاندەکەی ئەرمینیا کرد و دوای ئەنجامدانی کارە فەرمییەکان، هاوکارییەکان نێردران بۆ ناوچە زیانلێکەوتووەکان.
دەروازەی سنووری ئالیجان، کۆتا جار لە ساڵی 1988دا و لە کاتی بوومەلەرزەکەی ئەرمینیا بەکارهێندرا و لە رێگەیەوە هاوکارییە مرۆییەکانی رێکخراوی مانگی سووری تورکی گەیەندرانە ناوچە زیانلێکەوتووەکانی ئەرمینیا.