سەرۆک بارزانی پیرۆزبایی جەژنی چارشەمبا سۆر لە ئێزدییەکان دەکات
K24 - هەولێر:
سەرۆک بارزانی بە بۆنەی جەژنی سەری ساڵی ئایینی ئێزیدی پەیامێکی پرۆزبایی ئاراستە دەکات و هیوا دەخوازێت ئێزدییەکان هەموو بۆنە و جەژن و خۆشییەكانیان لە كەشێكی ئارام و پڕ لە ئاسوودەیی بەڕێ بكەن و كۆتایی بەو ئێش و ئازارانە بێت كە لە رابردوودا بەهۆی زوڵمی تیرۆریستان و ئاوارەیی و دەربەدەریدا بینیویانە.
لە پەیامەکەی سەرۆک بارزانیدا هاتووە، "بەبۆنەی هاتنەوەی جەژنی سەری ساڵی ئایینی ئێزدی (چارشەمبا سۆر)، گەرمترین پیرۆزبایی خۆم ئاراستەی خوشك و برایانی ئێزدی دەكەم و هیوای شادی و بەختەوەرییان بۆ دەخوازم".
دەقی پەیامی سەرۆك بارزانی بە بۆنەی جەژنی سەری ساڵی ئایینی ئێزدی (چارشەمبا سۆر)
بەناوی خودای بەخشندە و میهرەبان
بەبۆنەی هاتنەوەی جەژنی سەری ساڵی ئایینی ئێزدی (چارشەمبا سۆر)، گەرمترین پیرۆزبایی خۆم ئاراستەی خوشك و برایانی ئێزدی دەكەم و هیوای شادی و بەختەوەرییان بۆ دەخوازم.
هیوادارم هەموو بۆنە و جەژن و خۆشییەكانیان لە كەشێكی ئارام و پڕ لە ئاسوودەیی بەڕێ بكەن و كۆتایی بەو ئێش و ئازارانە بێت كە لە رابردوودا بەهۆی زوڵمی تیرۆریستان و ئاوارەیی و دەربەدەریدا بینیویانە.
بمێنن لە خێر و خۆشیدا
مسعود بارزانی
18ـی نیسانی 2023