بۆ جاری یەکەم دیمەنەکانی ناوەوەی کۆشکی سپی لەکاتی بەڕێوەچوونی ئۆپەراسیۆنی کوشتنی بن لادن بڵاودەکرێنەوە

K24 - هەولێر:

بەرەبەیانی رۆژی 2ی ئایاری ،2011 باراک ئۆباما، سەرۆکی پێشووی ویلایەتە یەکگرتووەکانی ئەمەریکا، کوژرانی ئوسامە بن لادن، سەرۆکی پێشووی رێکخراوی قاعیدەی لە پرۆسەیەکی تایبەتی هێزە کۆماندۆزەکانی وڵاتەکەیدا، لە ناوچەی وەزیرستانی پاکستان راگەیاند.

رۆژنامەی واشنتن پۆستی ئەمەریکی بۆ جاری یەکەم ژمارەیەک وێنەی باراک ئۆباما و جۆو بایدن، سەرۆکی ئێستای ئەو وڵاتە و ژمارەیەکی دیکە لە بەرپرسانی پێشووتری کۆشکی سپی لە کاتی بەڕێوەچوونی ئۆپەراسیۆنی هێرشکردنە سەر ئوسامە بن لادن لە پاکستان بڵاوکردەوە.

ئوسامە لە ساڵی 1979 کۆمەڵەیەکی خێرخوازی دامەزراند و دواتر سەربازگەیەکی بۆ مەشقپێکردنی چەکداران بۆ شەڕی سۆڤیەت لە ئەفغانستان بە ھاوکاری سعوودیە و ئەمەریکا دامەزراند. دواتر بۆخۆی بۆ شەڕ چووە ئەفغانستان و پاشان لە ساڵی 1988 ڕێکخراوی ئەلقاعیدەی لەو وڵاتە دامەزراند.

لە ساڵی 1992، بن لادن ڕووی کردە سوودان و ئەو وڵاتەی کردە بارەگەیەکی سەرەکیی ڕێکخراوەکەی. ئەم گرووپە لە ساڵی 1995 ھەوڵی دا سەرۆکی پێشووی میسر حوسنی موبارەک بکوژێت، بەڵام سەرکەوتوو نەبوو. ساڵێک پاش ئەوە، بەرپرسانی سعوودیە و میسر و ئەمەریکا گوشاریان خستە سەر بەرپرسانی سوودان بۆ ئەوەی ئوسامە لە خاکی وڵاتەکەیان دەربکەن. ئەویش ناچار بوو بگەڕێتەوە بۆ (جەلال ئاباد) لە ئەفغانستان. لەوێ پەیوەندییەکی بەھێزی لەگەڵ بەرپرسی بزووتنەوەی تاڵیبان مەلا عومەر پێک ھێنا و ڕێکخراوەکەی بەھێز کردەوە و چەندین کامپی تایبەت بە مەشقکردنی دروست کرد.

لە 11ی ئەیلولی ساڵی 2001، قاعیدە دوو فرۆکەی نەفەرهەڵگری لە ئەمەریکا رفاند، بەو دوو فرۆکەیە، دوو تاوەری بازرگانی ئەمەریکای لە شاری نیویۆرک کردە ئامانج، بەهۆیەوە  دوو هەزار و 699 کەس گیانیان لەدەستدا و زیاد لە شەش هەزاری دیکەش برینداربوون، ئەمەش جیا لەوەی ئەمەریکا 10 ملیار دۆلار زیانی ئابووری بەرکەوت.