سه‌رۆكایه‌تی هه‌رێم: خۆشحاڵین هاووڵاتیانی توركیا پشتیوانی حكوومەتی شەرعی و هەڵبژێردراو بوون
K24 - هه‌ولێر:
سه‌رۆكایه‌تی هه‌رێمی كوردستان، له راگه‌یه‌ندراوێكدا، ئیدانەی هەموو هەوڵێك دەكات كە لەدژی ئیرادەی گەل و پڕەنسیپەكانی دیموكراسی بیەوێت سیستەمی سیاسیی هەڵبژێردراو لەڕێگەی چەك و كۆدەتا بڕووخێنێت.
له به‌شێكی راگه‌یه‌ندراوه‌كه‌دا هاتووه: "لۆژیكی چەك و توندوتیژی دژی دیموكراسییە و سەقامگیریی سیاسی و پێكەوەژیان تێكدەدات".
سه‌رۆكایه‌تی هه‌رێمی كوردستان له راگه‌یه‌ندراوه‌كه، خۆشحاڵی خۆی له باره‌ی "شكستهێنانی كوده‌تا سه‌ربازییه‌كه‌ی توركیا" و راشیگه‌یاند، هه‌رێمی كوردستان، خوازیاری سه‌قامگیری و ئاشتییه.
ده‌قی راگه‌یه‌ندراوه‌كه:
ڕاگەیێندراوێك لە سەرۆكایەتیی هەرێمی كوردستان لەبارەی كۆدەتا سەربازییەكەی توركیا
لەبارەی كۆدەتا سەربازییەكەی شەوی 15 لەسەر 16ـی 7ـی 2016ـی توركیا، سەرۆكایەتیی هەرێمی كوردستان ئیدانەی هەموو هەوڵێك دەكات كە لەدژی ئیرادەی گەل و پڕەنسیپەكانی دیموكراسی بیەوێت سیستەمی سیاسیی هەڵبژێردراو لەڕێگەی چەك و كۆدەتا بڕووخێنێت. چونكە لۆژیكی چەك و توندوتیژی دژی دیموكراسیە و سەقامگیریی سیاسی و پێكەوەژیان تێكدەدات.
خۆشحاڵین كە هاووڵاتیانی توركیا پشتیوانی حكوومەتی شەرعی و هەڵبژێردراو بوون و ڕێگەیان نەدا كۆدەتاچییەكان سەر بكەون. هەرێمی كوردستانی عێراق خوازیاری سەقامگیری و ئاشتیە لە توركیا و ناوچەكە. چونكە تەنیا سەقامگیری و ئاشتییە خزمەتی بەرژەوەندیی گەلانی ناوچەكە دەكات.
سەرۆكایەتیی هەرێمی كوردستان
16ـی 7ـی 2016
