نێچیرڤان بارزانی: دهبێ دڵنیایی تەواو هەبێت لەوەی شايسته داراییيەکان و مووچەی مووچەخۆرانی هەرێمی کوردستان بە هۆکاری سیاسی دوا ناخرێن
K24 - هەولێر:
نێچیرڤان بارزانی، سەرۆکی هەرێمی کوردستان لە پەیامێکدا سەبارەت بە پەسەندکردنی بودجەی عێراق رایگەیاند، دهبێ دڵنیایی تەواو هەبێت لەوەی شايسته داراییيەکان و مووچەی مووچەخۆرانی هەرێمی کوردستان بە هۆکاری سیاسی دوا ناخرێن و فەرامۆش ناکرێن.
سەرۆکی هەرێمی کوردستان لە پەیامەکەیدا دەڵێت: پێويسته ياساى بودجە بە شێوەیەکی دادپەروەرانە جێبەجێ بکرێت و رەچاوی پێگەی هەرێمی کوردستان وەک قەوارەیەکی سیاسيی دەستووری و ناوچه كێشه لهسهرهكان بكات و ماف و بەرژەوەندیيەکانيان بپارێزێت.
سەرۆکی هەرێمی کوردستان پێشوازى لە پەسەندکردنی بودجەی سێ ساڵيی عێراق دەکات و دەشڵێت: هیوادارین ببێتە نەخشەڕێیەکی باش بۆ پێشكهوتنى ئابوورى و سەقامگیريی سياسى و زەمینەیەکی باشى وەبەرهێنان دروست بكات. دەستخۆشی لە ههموو ئهو بهڕێزانه دهكهين کە دڵسۆزانە بۆ بەرژەوەنديی هاووڵاتیيان و یەکسانيی خەڵکی عێراق کاریان کرد.
نێچیرڤان بارزانی راشیگەیاند، جێگەی داخه لە گفتوگۆکانی پهرلهماندا، هەندێ له پەرلەمانتاران بە شێوەیەکی نادروست هەڵسوکەوتیان بەرامبەر مافەکانی هەرێمی کوردستان و ناوچە ناکۆکی لەسەرەکان کرد.
بە بڕوای سەرۆکی هەرێمی کوردستان ئهوهى لە پەرلەمانی عێراق روويدا لهگهڵ بنهماكانى رێككهوتنى سياسيى هاوپهيمانيى بهڕێوهبردنى دهوڵهتدا نايهتهوه و ئهو ئاراسته و شێوهيه له كاركردن، خزمهت به پرۆسهى سياسى و دۆخ و داهاتووى عێراق ناكات.
نێچیرڤان بارزانی ئاماژەی بەوەدا، ئەوەی لە کاتی گفتوگۆى بودجەدا بینیویانە، مايهى نيگهرانييهكى قووڵه و جارێکی دیکە ئەو راستییهى سهلماند كه دابهشبوونى لايهنه كوردستانييهكان زيان به ههرێمى كوردستان دهگهيهنێت. گوتیشی: وێڕاى ئهمهش بە ویستى سیاسيی هاوبەش و به ڕەچاوکردنی بەرژەوەنديی گشتی، دەتوانین ئهمه بکەینە دەرفەتێک بۆ بەهێزکردنی متمانەى نێوانمان، ڕێکخستنەوەی باشترى ناوماڵی خۆمان، خاوکردنەوەی گرژیيەکان و چارەسەری کێشەکان بۆ بەهێزکردنی زیاتری عێراق و هەرێمی کوردستان.