دابەشکردنی فۆڕمی نۆ هەزار یەکەی نیشتەجێبوون راگەیەندرا
K24 – هەولێر
وەزارەتی ئاوەدانکردنەوە و نیشتەجێکردن فۆڕمی دابەشکردنی نۆ هەزار یەکەی نیشتەجێبوونی راگەیاند و چەند مەرجەکانیان بڵاوکردەوە.
ئەمڕۆ سێشەممە 8/8/2023، لە کۆنفرانسێکی رۆژنامەوانیدا دانا عەبدولکەریم وەزیری ئاوەدانکردنەوە و نیشتەجێکردنی حکومەتی هەرێمی کوردستان، دابەشکردنی فۆڕمی نۆ هەزار یەکەی نیشتەجێبوونی بۆ کەمدەرامەتەکان راگەیاند.
وەزیری ئاوەدانکردنەوە روونیکردەوە، ئەو یەکانە بەبێ پێشەکی بە قیستی 25 ساڵ دەدرێن بە هاووڵاتییانی کەمدەرات.
گوتیشی: "لە ئەمڕۆوە ئەو هاووڵاتییانەی خۆیان بە شایستە دەزانن بۆ وەرگرتنی ئەو یەکانە دەتوانن فۆڕمەکانیان پڕبکەنەوە و زانیارییەکان بخەنەڕوو، کە بەشێوەیەکی زانستی و بەهاوکاری کۆمەڵەی کرێنشینان فۆڕمەکان ئامادەکراوە".
روونیکردەوە: "لە ماوەی سێ مانگدا هاووڵاتییان دەتوان فۆڕمەکانیان پێشکەش بکەن، دواتر لیژنە لە سنووری ناحیە و قەزا و ئیدارە سەربەخۆکان پێکدەهێنرێ بۆ دیاریکردنی خاڵەکان".
دانا عەبدولکەریم، ئاشکرای کرد: "کۆی ئەو یەکانە نۆ هەزار و چوار یەکەی نیشتەجێبوونە و بەشێکیان تەواو بوونە، دواتر بەپێی پارێزگا و ئیدارە سەربەخۆکان زانیاری وردتر دەخرێتەڕوو".
بەگوێرەی مەرجەکان، ئەو کەسەی فۆڕم بۆ وەرگرتنی یەکەی نیشتەجێبوون پێشکەش دەکات دەبێ تەمەنی لە سەرووی 18 ساڵ بێت و خێزاندار بێت.
پێشکەشکردنی فۆڕم بۆ وەرگرتنی یەکەی نیشتەجێبوون بەشێوەی ئۆنلاین دەبێت و لە سەرەتادا، داواکار دەبێ مەرجەکان بزانێت، هەر کەسێک رازی نەبێت بەو مەرجانە بۆی نییە سوود لەو سیستەمە وەربگرێت و داواکاری پێشکەش بکات.
وەزارەتی ئاوەدانکردنەوە رایگەیاندووە، بڕیاریانداوە هیچ بارگرانیەک بۆ کەس دروست نەبێت و هیچ بەڵگەیەک داوا نەکات، بەڵام پاشان هەر کەسێک بەپێی ئەو مەرجانەی داواکراوە توانی خاڵی پێویست بەدەست بهێنێت و ببێتە خاوەن یەکەیەک لەو یەکە نیشتەجێبووانەی دیاریکراون ئەوا مەرجە هەموو زانیارییەکان بسەلمێنێت کە لەم فۆڕمی داواکارییەدا تۆماری کردووە.
