یەکەم فێستیڤاڵی هەنار و هەنگوین لە زاخۆ بەڕێوەدەچێت

K24 - هەولێر

بە بەشداری دەیان جووتیار و هەنگەوان، یەکەم فێستیڤاڵی هەنار و هەنگوین لە زاخۆ بەڕێوەدەچێت. بەڕێوەبەری گشتیی کشتوکاڵی زاخۆ دەڵێت، ئامانج لە فێستیڤاڵەکە بەبازاڕکردنی بەرهەمی جووتیارانە.

بەیانی ئەمڕۆ چوارشەممە، 18ـی ئۆکتۆبەری 2023، یەکەمین فێستیڤاڵی هەنار و هەنگوێن لە پردی دەلالی زاخۆ بە بەشداری 30 جووتیار و هەنگەوان دەستیپێکرد. محەممەد سەلمان، بەڕێوەبەری گشتیی کشتوکاڵی زاخۆ بە کوردستان24ـی راگەیاند، "ئامانج لە کردنەوەی فێستیڤاڵەکە نیشاندانی بەرهەمی جووتیارانمانە لە سنووری ئیدارەی سەربەخۆی زاخۆ بە خەڵکی ناوچەکە."

وەکو ئەوەی محەممەد سەلمان باسی دەکات، "دەڤەری زاخۆ دەڤەرێکی کشتوکاڵییە و خاک و کەشوهەواکەی زۆر گونجاوە بۆ کاری كشتوکاڵی، ئەمەش وایکردووە ساڵانە بەرهەم ناوخۆیی جووتیارانمان زۆر بێت، لەوانەش هەنار و هەنگوین، بۆیە ویستمان لەرێگەی ئەم فێستیڤاڵە بەرهەمەکانیان نیشان بدەین".

بەڕێوەبەری گشتیی کشتوکاڵی زاخۆ ئاماژەی بەوەش کرد، "جووتیاران داوا لە حکومەتی هەرێمی کوردستان دەکەن هاوکاریان بێت و کار بۆ بەبازاڕکردنی بەرهەمەکانیان بکات. هاوکات داوا دەکەن ئاو و پێدوایستییەکانی دیکەیان بۆ دابینبکرێن، هەڵبەتە حکومەتیش ئەم داواکارییانەی لەبەرچاو گرتووە و بەردەوام پشتیوانی لە جووتیاران دەکات".