نشینگەی هەولێر هۆشداری دەداتە کوردانی رۆژئاوای کوردستان
K24 – هەولێر
بەڕێوەبەری نشینگەی هەولێر رایگەیاند، سەرووی 150 هەزار بیانی مۆڵەتی مانەوەیان لە هەرێمی کوردستان پێدراوە. هۆشداریش دەداتە ئەو کوردانەی رۆژئاوای کوردستان کە لە هەرێمی کوردستان نیشتەجێن، کە بۆ کارکردن نەچنە شارەکانی دیکەی عێراق.
ئەمڕۆ دووشەممە، 4ی کانوونی یەکەمی 2023، شێخ کامیل محەممەد، بەڕێوەبەری نشینگەی هەولێر، بە کوردستان24ـی راگەیاند، بەپێی ئاماری ساڵی رابردوو، لە سەرووی 150 هەزار بیانی بەشێوەی ئۆنڵاین مۆڵەتی وەرگرتنیان لە وەزارەتی ناوخۆی هەرێمی کوردستان وەرگرتووە".
گوتیشی: "ئەو بیانیانەی هاتوونەتە هەرێمی کوردستان لە 71 وڵاتی جیاجیاوە هاتوون، بەڵام زیاتر هاووڵاتییانی دراوسێ وەک ئێران، تورکیا و سووریان سەردانی هەرێمی کوردستانیان کردووە، بۆ مانەوە بێت یاخود کارکردن".
ئاماژەی بەوەشدا: "بەپێی رێنماییەکانی وەزارەتی ناوخۆ ئێمە مۆڵەتی مانەوەیان پێدەدەین، بەڵام جۆری پێدانی مۆڵەتەکە جیاوازە، هەیە مۆڵەتی کاری هەیە، هەشیانە لە رێکخراوێک یان کۆمپانیایەکی بیانی کاردەکات، ئەوانە مۆڵەت پێدانیان جیاوازە، ئەوانەی هاووڵاتیی ئاسایین، رێنماییەکان لە کوێ کاردەکات، کێ پشتگیری دەکات کۆمپانیایە، چێشتخانەی یاخود هەر شوێنێکی دیکە کە دەیەوێت کار بکات، سەرەتا دەبێت هەموو رێنماییەکان تەواو بکات ئینجا مۆڵەتی مانەوەی نشینگەی پێدەدریت، ئەویش بۆ ماوەی شەش مانگ تا ساڵێکە، بەو مەرجەی کەسێک هەبێت پشتگیری بکات، بۆ ئەوەی تووشی هەر گرفتێک و کێشەیەک بوو ئێمە بتوانین لە رێگای ئەو کەسەی پشتگیری کردووە بدۆزرێتەوە".
بەڕێوەبەری نشینگەی هەولێر، گوتی: "لایەنی ئەمنی و ئاسایش بۆ ئێمە زۆر گرنگە، بۆ ئەو کەسەی کە دەیەوێت لە هەرێمی کوردستان بمێنێتەوە، ئایا شیاوە بۆ مانەوە بۆ کارکردن و هاتووچۆ یاخود نا، ئەوە گرنگترین خاڵی مۆڵەت پێدانی مانەوەیە، دواتر پشکنینی خوێن، ئێستا لە نشینگەی هەولێر پشکنینی خوێن بەشێوەی ئۆنڵاینە، پشکنینەکەی لای ئێمەیە، ئەگەر نەخۆشی هەبێت دەبێت چارەسەر بکات، ئەگەر نەخۆشییەکەشی چارەسەر نەبوو ئەوە دەبێت بگەڕێتەوە وڵاتی خۆی بەتایبەت ئەوانەی کە هەڵگری نەخۆشەیە گوازاوەکانن".
دەشڵێت: "ناردنەوەی هاووڵاتییانی کوردی رۆژئاوای کوردستان لە ناوەڕاستی عێراق زیاتر پەیوەندی بەلایەنی سیاسییەوە هەیە، یاخود ناوچەکانی دیکەی خواری عێراق باوەڕ بە نشینگەی ئێمە ناکەن، ئەوە هۆکارە سەرەکییەکەیە کە لێرە مۆڵەتی مانەوە دەردەهێنن دەڕۆن بۆ خوارووی عێراق بۆ کار، هەندێکیان ددان بەو مۆڵەتەدا دانانێن،هەر بۆیە هۆشداری دەدەینە کوردانی رۆژئاوا کە سەردانی خوارووی عێراق نەکەن".
شێخ کامل محەممەد، رێکارییەکانی مۆڵەتی مانەوەی ئاشکراکرد و گوت: "رێکاری پێدانی مۆڵەتی مانەوە لە بەغدا زۆر قورسە، هاووڵاتییەکی بیانی زۆر ئەزیەت دەدرێت تا مۆڵەتی پێدەدرێت، ئەوە رێنمایی تایبەت بەخۆیانە، بەڵام وەزارەتی ناوخۆی عێراق لە ماوەی رابردوو سەردانی نشینگەی هەولێری کرد تووشی شۆک بوون، لەو پێشکەوتنەی کە لێرە هەیە، چونکە ئێستا لای ئێمە هەمووی ئۆنڵاینە تەنیا بۆ وەرگرتنەوەی کارتی مۆڵەت پێدان و ئەو بڕە پارەی کە حکومەتی هەرێم دیاریکردووە بۆیان سەردانمان دەکەن، لە ماڵەوە دەتوانی داوای مۆڵەت بکەی لە رێگای سیستمەکەمانەوە، بەڵام سیستمەکەش سنووردارە، لە بەغدا پێچەوانەیە هیچ سیستەم نییە، ڤیزای لەوێ گرانترە و درەنگتر دەگەڕێتەوە، لەسەر ئەو ڤیزایەش لە عێراق مۆڵەتی پێدەدەن، بەڵام لێرە ئەگەر هیچ کێشەیەکی ئەمنی نەبێت بە دوو رۆژ ڤیزا وەردەگرێت دەتوانێت بۆ ماوەی مانگێک بمێنێتەوە، لەو ماوەدا ئەگەر کاری دەستکەوێت یاخود کەسێک پشتگیری و کەفالەتی کرد، دەتوانێت سەردانی نشینگە بکات و داوای مۆڵەتی نیشتەجێبوون بکات، هەر بۆیە لێرە کار ئاسانی بۆ هاووڵاتییانی بیانی زۆر کراوە و باشترە".
راشیگەیاند، هیچ هاووڵاتییەکی بیانی گلەیی لە ئێمە نەبووە، تەنیا هەندێکیان نەبێ پارێزەر دەگرن، ئەو پارێزەرە بەهۆکاری دیکە دوای دەخات ئێمە نازانین، تەنیا گلەییان لەسەر سزای پێبژاردن هەیە ئەوەش لە دەستی ئێمەدا نییە، لەدەستی خودی ئەو کەسەیە کە داوای مۆڵەتی مانەوەی کردووە و ماوەی بەسەرچووە پشتگوێی خستووە، کاتێک نوێی دەکاتەوە دەبێت سزای پێبژاردن بدات".
ئا: لاڤین عومەر