محه‌ممه‌دی حاجی مه‌حموود: پێویسته به‌غدا به‌رامبه‌ر نه‌هامه‌تییه‌كان داوای لێبوردن له خه‌ڵكی كوردستان بكات
K24 – هەولێر:
سه‌رۆكی پارتی سۆسیال دیموكراتی كوردستان رایده‌گه‌یه‌نێت، پێویسته به‌غدا داوای لێبوردن له خه‌ڵكی كوردستان بكات.
محه‌ممه‌دی حاجی مه‌حموود، سه‌رۆكی پارتی سۆسیال دیموكراتی كوردستان له‌میانه‌ی كۆنفرانسێكی رۆژنامه‌وانی ئه‌مڕۆ (دووشه‌ممه 11ـی كانوونی یه‌كه‌می 2023) رایگه‌یاند، پێویسته حكومه‌تی عێراق وه‌ك چۆن داوای لێبوردنی له كوه‌یت كرد و قه‌ره‌بووی كردنه‌وه، پێویسته به‌رامبه‌ر نه‌هامه‌تییه‌كان داوای لێبوردن له خه‌ڵكی كوردستان بكات.
له‌باره‌ی به‌ڕێوه‌چوونی هه‌ڵبژاردنی ئه‌نجوومه‌نی پارێزگاكان له كه‌ركووك ناوبراو گوتی: دواخستنی هه‌ڵبژاردن ته‌نیا له پارێزگای كه‌ركووك كارێكی مه‌حاڵه، به‌ڵام له‌وانه‌یه هه‌وڵبده‌ن چه‌ند بڕیارێك له دژی به‌رژه‌وه‌ندییه‌كانی گه‌لی كورد بده‌ن.
جه‌ختیشیكرده‌وه، پێویسته له‌سه‌ر ئاستێكی زۆر فراوان كورد به‌شداری له هه‌ڵبژاردندا بكات، بۆ ئه‌وه‌ی بتوانن كۆتایی به‌و ده‌سه‌ڵاته بهێنن، كه به‌زۆر به‌سه‌ر خه‌ڵكی كه‌ركووكدا سه‌پێندراوه.
گوتیشی: پێویسته كورد له هه‌شت تاكو نۆ كورسی له كه‌ركووك به ده‌ست بهێنێت.
وا بڕیارە لە 18ـی کانوونی یەکەمی ئەمساڵ، هەڵبژاردنی ئەنجوومەنی پارێزگاکانی عێراق (جگەلە پارێزگاکانی هەرێمی کوردستان) بەڕێوەبچێت کە زیاتر لە 16 ملیۆن كه‌س مافی ده‌نگدانیان لەو هەڵبژاردنە هەیە و کۆمیسیۆنی هەڵبژاردنەکانی عێراقیش ئامادەکاری کردووە بۆ کردنەوەی حەوت هەزار و 765 بنکەی ده‌نگدان کە 48 هەزار و 40 وێستگەی دەنگدان لەخۆدەگرێت، بۆ دەنگدانی گشتی، تایبەت و ئاوارەکان.
بەگوێرەی ئامارەکانی کۆمیسیۆنی باڵای هەڵبژاردنەکانی عێراقیش، بۆ هەڵبژاردنی ئەنجوومەنی پارێزگاکانی عێراق، ناوەندەکانی دەنگدان و وێستگەکان لەلایەن فەرمانبەرانی دەوڵەت و خوێندکارانی زانکۆ و دەرچووان بەڕێوەدەبرێن كه ژماره‌یان 214 هەزار و 595 کارمەندە.
رۆژی (31ـی تشرینی یەکەمی 2023) کۆمیسیۆنی باڵای هەڵبژاردنەکانی عێراق رایگەیاند، پێنج هەزار و 915 کاندید لە هەڵبژاردنی ئەنجوومەنی پارێزگاکان کێبڕکێ دەکەن، چوار هەزار و 258 کاندیدیان لە رەگەزی نێرن و هەزار و 657 کاندیدیش لە رەگەزی مێن، لەمیانی پرۆسەی وردبینیکردن و بەدواداچوون، 357 کاندید لە کێبڕکێی هەڵبژاردن دوورخرانەوە.