بە وێنە؛ بەشداریی مەسرور بارزانی لە کۆنگرەی یەکێتیی ئافرەتانی کوردستان
K24 - هەولێر
مەسرور بارزانی، سەرۆکی حکومەتی هەرێمی کوردستان و جێگری سەرۆکی پارتی؛ بەیانیی ئەمڕۆ پێنجشەممە، 21-12-2023، بەشداریی لە نۆیەمین کۆنگرەی یەکێتیی ئافرەتانی کوردستان لەژێر ناوی (هێز و توانای ئافرەت، بناغەی پێشکەوتنی ئاشتی و ئابوورییە) کرد.
کۆنگرەکە بۆ ماوەی دوو رۆژ بەردەوام دەبێت. سەرۆکوەزیرانی هەرێمی کوردستان لەمیانی کۆنگرەکەدا گوتارێکی پێشکەشکرد و ئاماژەی بەوە کرد، "یەکێتیی ئافرەتانی کوردستان مێژوویەکی پڕ لە سەروەری و شانازی هەیە لە قۆناغە جیاوازەکانی خەباتی رزگاریی خوازی گەلی کوردستان؛ یەکێتیی ئافرەتان و ئافرەتانی کوردستان بە گشتی، هەمیشە پشتیوانی هێزەکانی پێشمەرگەی کوردستان بوون و لە ریزی پێشەوەی بەرگریکردن بوون لە مافە رەواکانی گەلی کوردستان".
سەرۆکوەزیران مەسرور بارزانی لەبارەی بەشداریی ئافرەتان لە دامەزراوەکانی حکومەتی هەرێمی کوردستاندا، گوتی: "لە کابینەی نۆیەمی حکومەتی هەرێمی کوردستاندا رێژەی بەشداریی ئافرەتان لە پلە باڵاکانی حکومەتدا بەشێوەیەکی بەرچاو زیادیکردووە".
یەكێتیی ئافرەتانی كوردستان لە 11/12/1952 بە ڕێنوێنی و ڕاسپاردەی بارزانی نەمر لە شاری سلێمانی لە مالی میرزا غەفوور بە شێوەیەكی نهێنی دامەزرا، بەڵام لەبەر نالەباری بارودۆخی سیاسی ئەو كاتە نەتوانرا كۆنگرە و كونفرانس ببەسترێت و هەڵبژاردن بكرێت و سكرتێر و هەیكەلی تەنزیمی دیاری بكرێت.
وەکو ئەوەی سەرۆکی حکومەتی هەرێمی کوردستان ئاماژەی پێ دا، "لە دوای راپەرینی ساڵ1991 ؛ ئافرەتانی کوردستان رۆڵێکی کارایان لە دامەزراوەکانی هەرێمی کوردستاندا هەبووە و هەیە. توانیویانە بە لێهاتوویی خۆیان رۆڵی کاریگەریی خۆیان لە کایە جۆراوجۆرەکاندا بسەلمێنن".
هەر لەمیانی نۆیەمین کۆنگرەی یەکێتیی ئافرەتانی کوردستان؛ سەرۆکوەزیران مەسرور بارزانی خەڵاتی رێزلێنان بەخشییە سکرتێرەکانی پێشووی یەکێتی ئافرەتانی کوردستان و ژمارەیەک ئافرەتی تێکۆشەر.