نووری كاكەخان: هونەر زەرەری ماددی زۆری لێداوم
K24 – هەولێر:
هونەرمەند نووری كاكەخان لەم گفتوگۆیەیدا بۆ كوردستان24 ئاماژه بهوه دەكات، دەقی هونەری باش و ئەكتەری باش دەبێتە سەردەمی زێڕین بۆ هونەر دەشڵێت: هونەر زەرەری ماددی زۆری لێداوم.
كوردستان24: دوا کاری هونەریت چی بوو؟
نووری كاكەخان: زنجیرە درامای پێرەمێرد و كۆمەڵگەكەی بوو، كە لە سی زنجیرە پێكهاتووە و دەرهێنانی شۆڕش قادر، چاوەرێی سپۆنسەرین تا پێشكەش بكرێت.
كوردستان24: چ کاتێک بە سەردەمی زێڕینی هونەری كوردی دەزانیت؟
نووری كاكەخان: هەركاتێك دەقێكی باش هەبێت لەگەڵ ژمارەیەك كارەكتەری باش ئەوە سەردەمی زێرینی هونەری كوردیە و ئەو كارە دەمێنێتەوە و دەبێتە كارێكی زێڕین.
كوردستان24: هونەر زیانی مادی لێداویت؟
نووری كاكەخان: هونەر زەرەری مادی زۆری لێداوم بە تایبەت لەو كاتەی وەستایی سەرتاشین بووم، بە مانگ و دوو مانگ دوكانكەم جێدەهێشت پرۆڤەم دەكرد بەبێ ئەوەی دینارێك لەكەس وەربگرم، بەڵام قەرەبووی ئەوە زەرەرەشی بۆ كردوومەتەوە خۆشەویستی و ریزی زۆری لەناو خەڵكدا پێبەخشیووم.
كوردستان24: ئەو رۆڵانەی بەرجەستە کردوون تاچەند لە كەسایەتی خۆتەوە نزیكە؟
نووری كاكەخان: تەنیا دوو كاریان ئەوانیش هەیاسی خاس لە درامای یاداشتەكانی سوڵتان محمود، كەسایەتی مەریوان لە درامای گوڵە بێرۆژەكان.
كوردستان24: چۆن بوویتە كامێرەمان؟
نووری كاكەخان: ئەوە سەرەتای نەوەتەكان بوو، كە كاری وێنەگرتنم بۆ هەریەك لە هونەرمەندان میدیا حوسێن و سالار محمود و عەتا ئەحمەد و كامەران عومەر بەهجەت یەحیا، حەمە رەئوف كەركوكی، زاهیر جەلال، دڵنیا قەرەداغی، عەباس محەممەد و چەند هونەرمەندی دیكە كردووە.
كوردستان24: یەکەم کاری هونەریت کەی بوو؟
نووری كاكەخان: یەكەم كاری هونەریم بە ناوی شەوێك لە ژیانی خانزاد سەرەتای هەشتاكانی سەدەی رابردوو بوو، پاشان لە تەلەڤزیۆنی كەركوك بەشداری بوكی ژێر دەواری رەشم كرد.
كوردستان24: چۆن دەستكرد بەكاری هونەری؟
نووری كاكەخان: ئەوكات وەها باو بوو شەوانە خێزانەكانی سلێمانی دەچوونە سینەما، دایك و باوكم دەچونە سیما منیشیان دەبرد هەر لەو كاتەوە ئەو حەزم لەلا دروست بوو كە ببمە ئەكتەر و كاری هونەری بكەم.
كوردستان24: منداڵیت چۆن بوو؟
نووری كاكەخان: بەهۆی ئەوەی هەژار بووین هەر بە منداڵی كرێكاریم كردووە دوا كاریشم سەرتاشی بووم لەسەر دەستی ئاواتی حەمە فەرەج.
كوردستان24: ئەوەی بیرت ناچێتەوە؟
نووری كاكەخان: ئەو ساڵانەی لەگەڵ باوكم بووین قەت لەبیرم ناچنەوە كە دەچوینە سینەما سیروان و چایخانەی حەمە رەق لە شەقامی بێكەس و زۆر شوێنی دیكەش.
كوردستان24: گەڕەكی كانێسكان چیت بیر دەكاتەوە؟
نووری كاكەخان: ژیانێكی سادە و ساكاری منداڵێم بیردەخاتەوە، كە تۆپێكی لاستیكم نەبوو لە كۆڵان و چاوشاركێمان دەكرد.