ده‌یڤید موله‌ر: پێویسته ئه‌وروپییه‌كان و جیهان مێژوو و چیرۆكی كورد و هه‌رێمی كوردستان بزانن
K24 - هەولێر:
ئه‌مڕۆ (دووشه‌ممه 15ـی كانوونی دووه‌می 2024) ده‌یڤید موله‌ر، داكۆكیكاری سیاسی ئازادی ئایینی له عێراق تایبه‌ت به كوردستان24 رایگه‌یاند، له ماوه‌ی شه‌ش ساڵی رابردوودا 16 جار سه‌ردانی هه‌رێمی كوردستانی كردووه و كاتێك ده‌گاته فڕۆكه‌خانه‌ی هه‌ولێر هه‌ستی به ئارامی و ئاسایش ده‌كات.
ناوبراو باسی له‌وه‌ش كرد، سه‌ردانی ماڵی كوردستانی كردووه له داڤۆس به‌و پێیه‌ی په‌یوه‌ندی له‌گه‌ڵ كورد و هه‌رێمی كوردستان هه‌یه و ده‌شڵێت، هه‌رێمی كوردستانی خۆش ده‌وێت و بوونی ماڵی كوردستانیش له داڤۆس جێی بایه‌خه.
هه‌روه‌ها ده‌یڤید موله‌ر سه‌رنجی بۆ ئه‌وه‌ش راكێشا، دۆڵمه و چای كوردی كه له ماڵی كوردستان له داڤۆس ئاماده‌كراوه، زۆر تایبه‌ت و تامێكی جیاوازیان هه‌یه.
داكۆكیكاری سیاسی ئازادی ئایینی له عێراق به پێویستیشی زانی ئه‌وروپییه‌كان و جیهان مێژوو و چیرۆكی كورد و هه‌رێمی كوردستان بزانن، به‌تایبه‌ت كه ناوچه‌یه‌كی پڕ له ئاسایشه و خه‌ڵك له‌و ئه‌وروپاوه ده‌توانن به پایسكیل سه‌ردانی كوردستان و به‌سه‌ر شاخ و چیاكانی بكه‌وێت و گه‌شت بكات.
ده‌یڤید موله‌ر به گرنگی زانی خه‌ڵك له‌و ئه‌وروپا و جیهانه‌وه سه‌ردانی كوردستان بكه‌ن و راسته‌وخۆ هه‌رێمی كوردستان و خه‌ڵكه‌كه‌ی و مێژووه‌كه‌ی ببینێت، كه تا ئێستا ته‌نیا له رێگه‌ی میدیاكانه‌وه ئه‌وه‌یان زانیوه. گوتیشی، داعش مێژوویه‌ك بوو و كۆتایی پێ هات، به‌ڵام گرنگه میدیاكانی هه‌رێمی كوردستان ئه‌و مێژووه به‌رده‌وام نیشان بده‌نه‌وه بۆ ئه‌وه‌ی وه‌بیر جیهانی بهێننه‌وه.
ئەمڕۆ دووشەممە، 15-01-2024، مەسرور بارزانی، سەرۆکی حکومەتی هەرێمی کوردستان بە سەرۆکایەتیی شاندێک بۆ بەشداریکردن لە کۆڕبەندی ئابووری جیهانی لە داڤۆس؛ بەرەو سویسرا بەڕێکەوت.
حکومەتی هەرێمی کوردستان لە راگەیەندراوێکدا ئاماژەی بەوە کردووە، مەسرور بارزانی لە پەراوێزی بەشداریکردنی لە کۆڕبەندی ئابووری جیهانیی داڤۆس، لەگەڵ ژمارەیەک لە سەرۆک و سەرۆک وەزیران و بەرپرسانی باڵای وڵاتانی رۆژهەڵاتی ناوەڕاست و ئەوروپا و جیهان کۆدەبێتەوە و لە دیدارەکانیدا، چەندین تەوەر و پرسی ناوخۆیی و هەرێمی و جیهانی تاوتوێ دەکات، لەوانەش پەرەپێدانی پەیوەندیی دوولایەنە بەتایبەتی لە بوارەکانی ئابووری و وەبەرهێناندا.
ئاماژە بەوەش کراوە، بڕیارە سەرۆکوەزیرانی هەرێمی کوردستان لە پانێلێکی کۆڕبەندەکەشدا بەشدار بێت، کە تایبەتە بە ململانێ و ناکۆکییەکانی رۆژهەڵاتی ناوەڕاست.
لە راگەیەندراوەکەدا هاتووە: "بەشداریی سەرۆکی حکومەت لە کۆڕبەندی داڤۆس، لە چوارچێوەی هەوڵە بەردەوامەکانیدایە بۆ پتەوکردنی پەیوەندییەکانی هەرێمی کوردستان لەگەڵ وڵاتان و تاوتوێکردنی ئەو پرسانەی کە پەیوەندییان بە ئایندەی عێراق و ناوچەکە بە گشتی هەیە".
شاندی هەرێمی كوردستان لە ژمارەیەک لە بەرپرسانی حکومی و وەبەرهێنەر و خاوەنکارانی کوردستان پێکهاتووە کە یەکەمجارە بەشداری لە داڤۆس دەکەن. هەروەها بە دەستپێشخەری و راسپاردەی سەرۆکوەزیران، ماڵی کوردستان لە داڤۆس دەکرێتەوە.
کۆڕبەندی داڤۆس 2024، ئەمڕۆ دووشەممە بە درووشمی" بنیاتنانەوەی متمانە" دەستیپێکرد و تا رۆژی هەیینی، 19-01-2024، بەردەوام دەبێت. کۆڕبەندی ئەمساڵ پێشوازی دەکات لە 100 سەرۆک حکومەت و زۆربەی دەزگا و رێکخراوە نێودەوڵەتییەکان و هەزار هاوبەشی کۆڕبەندەکە و سەرکردە کۆمەڵایەتییەکان. هەروەها شارەزایان و نوێنەرانی گەنجان، کارسازان و میدیاکانیش ئامادە دەبن.