رۆمانۆوسكی پێشوازی له ده‌ستپێكردنی كاره‌كانی كۆمیسیۆنی باڵای سەربازی نێوان ئه‌مه‌ریكا و عێراق ده‌كات
K24 - هەولێر:
باڵیۆزی ئه‌مه‌ریكا له عێراق پێشوازی له ده‌ستپێكردنی كاره‌كانی كۆمیسیۆنی باڵای هاوبه‌شی سەربازی نێوان ئه‌مه‌ریكا و عێراق ده‌كات.
ئه‌لینا رۆمانۆوسكی باڵیۆزی ئه‌مه‌ریكا له عێراق، له هه‌ژماری تایبه‌تی خۆی له تۆڕی كۆمه‌ڵایه‌تی (ئێكس) تویته‌ری پێشوو نووسیوویه‌تی: "پێشوازی له ده‌ستپێكردنی كاره‌كانی كۆمیسیۆنی باڵای هاوبه‌شی سەربازی نێوان ئه‌مه‌ریكا و عێراق بۆ گۆڕینی ئەركی هاوپەیمانی نێودەوڵەتی دژی داعش و گۆڕینی ئەرکەکەیان له عێراق ده‌كه‌م".
هه‌روه‌ها رۆمانۆوسكی روونیشیكرده‌وه، "ئه‌م كۆمیسیۆنه پشت ده‌به‌ستێت به گفتوگۆ دووقۆڵییه‌كانی پێشوو و هه‌روه‌ها سه‌ركه‌وتنه‌كان به‌سه‌ر داعش، به‌هه‌ماهه‌نگی له‌گه‌ڵ حكومه‌تی عێراق و هه‌نگاونان به‌ره‌و هاوبه‌شێتی ئه‌منی دوولایه‌نه به پابەندبوونی بەردەوامی ئه‌مه‌ریكا له پشتیوانیکردنی ئاسایشی ناوچەکە و سەروەری خاكی عێراق".
پێشتریش سابت محه‌ممه‌د عه‌باسی وه‌زیری به‌رگری عێراق رایگه‌یاندبوو، لیژنەی باڵای سەربازی عێراقی – ئەمه‌ریکی دەست بە گفتوگۆکانی لەگەڵ وڵاتانی هاوپەیمانی نێودەوڵەتی دەکاتەوە بۆ دیاریكردنی واده‌ی كشانه‌وه‌ی هێزه‌كانی هاوپه‌یمانان له عێراق.
رۆژی چوارشەممە(24 ی کانوونی دووەمی 2024)، وەزارەتی دەرەوەی عێراق ئاشکرای کرد، حکومەتی ئەمه‌ریکا له رێگه‌ی ئه‌لینا رۆمانۆوسكی باڵیۆزی وڵاته‌كه‌ی له به‌غدا نامەیەکی ئاراستەی حکومەتی عێراقی کرد، بێ ئەوەی ناوەرۆکی نامەکە ئاشکرا بکات.
ئاژانسی هه‌واڵی رۆیته‌رز ئاماژه‌ی به ناوه‌ڕۆكی نامه‌كه‌ی ئه‌مه‌ریكا بۆ عێراق كرد، كه په‌یوه‌سته به كشانه‌وه‌ی هاوپه‌یمانی نێوده‌وڵه‌تیی دژی داعش له عێراق.
دوێنێ پێنجشه‌ممه (25ـی کانوونی دووەمی 2024) لۆید ئۆستن، وەزیری بەرگری ئەمەریكا رایگەیاند، لە رۆژانی داهاتوو كۆبوونەوەكانی كۆمیسیۆنی باڵای سەربازی ئەمەریكا و عێراق دەستپێدەكەن.
ئۆستن ئاماژەی بەوەشکردبوو، ئەمە هاوكار دەبێت بۆ دروستكردنی هاوبەشی بەردەوامی نێوان عێراق و ئه‌مه‌ریكا لە بواری ئاسایش، لەسەر بنەمای ئەو سەركەوتنانەی عێراق بە هاوبەشی لەگەڵ كەمپەینی دژی داعش لەگەڵ هاوپەیمانی نێودەوڵەتی بەدەستیهێناوە.
هاوکات لۆید ئۆستن ئه‌وه‌شی خستبووه‌ڕوو، هێزەكانی ئەمەریكا لەسەر بانگهێشتی حكومەتی عێراق و لە چوارچێوەی هاوپەیمانی نێودەوڵەتی دژی داعش لەو وڵاتەن. ئەمەریكاش پابەندە بە ئاسایش و سەقامگیری و سەروەری عێراق و ناوچەكە.
له‌لایه‌ن خۆشییه‌وه وەزارەتی دەرەوەی عێراقیش پابەندی خۆی بە پاراستنی راوێژكارانی هاوپەیمانی نێودەوڵەتی دووپاتكردبووه و ئاماژەی به‌وه‌كردبوو، گفتوگۆکانیشیان بۆ پێکهێنانی لیژنەیەکی باڵای سەربازی بۆ هەڵسانگادنی مەترسی داعش و دیاریکردنی خشتەیەکی كاتی بۆ ماوەی مانەوەی هاوپەیمانی نێودەوڵەتی لە عێراق سەرکەوتوو بوون.
بەگوێرەی راگەیەندراوەکەی وەزارەتی دەرەوەی عێراق، دەست بە کەمکردنەوەی ژمارەی راوێژکارانی سەربازی هاوپەیمانی نێوەدوڵەتی لە دژی داعش دەکرێت و کار دەكەن بۆ کۆتاییهێنان بە ئەرکە سەربازییەکانیان لە عێراق. لە و ماوەیەشدا، حکومەتی عێراق پابەندە بە پاراستنی راوێژکارانی هاوپەیمانی نێودەوڵەتی و رێگریکردن لە تەشەنەکردن و پەرەسەندنی ئاڵۆزییەکان.
أرحبُّ ببدء أعمال اللجنة العسكرية العليا الأمريكية العراقية #HMC. تبني هذه اللجنة على المباحثات الثنائية السابقة والنجاحات التي حققتها حملة العراق لهزيمة داعش بالشراكة مع @CJTFOIR. إن الانتقال الى شراكة أمنية ثنائية مستدامة أمرٌ مهمٌ لتأكيد التزامنا المستمر بدعم أمن المنطقة… pic.twitter.com/9AnTKwnmlq
— Ambassador Alina L. Romanowski (@USAmbIraq) January 25, 2024