ئەلینا رۆمانۆوسکی: پێویستە هەموو هاووڵاتییانی هەرێمی کوردستان دەنگیان هەبێت لە دیاریکردنی ئاییندەیان
K24 – هەولێر:
باڵیۆزی ئەمەریکا لە عێراق پشتیوانی وڵاتەکەی بۆ ئەنجامدانی هەڵبژاردنی پەرلەمانی کوردستان بەشێوەیەکی ئازاد و شەفاف دووپاتکردەوە و رایگەیاندووە: پێویستە هەموو هاووڵاتییانی هەرێمی کوردستان دەنگیان هەبێت لە دیاریکردنی ئاییندەیان.
ئەلینا رۆمانۆوسکی، باڵیۆزی ئەمەریکا لە عێراق لەبارەی دیدارەکەی لەگەڵ سەرۆک بارزانی پەیامێکی لە تۆڕی کۆمەڵایەتی ئێکس بڵاوکردەوە و ئاماژەی بەوەکردووە: لەگەڵ سەرۆک مەسعود بارزانی کۆبوومەوە بۆ جەختکردنەوە لەسەر پشتیوانیمان بۆ ئەنجامدانی هەڵبژاردنی پەرلەمانی کوردستان بەشێوەیەکی ئازاد، پاک و بێگەرد، شەفاف و جێی متمانە.
رۆمانۆوسکی دووپاتیکردووەتەوە: پێویستە هەموو هاووڵاتییانی هەرێمی کوردستان دەنگیان هەبێت بۆ دیاریکردنی ئاییندەیان.
رۆژی چوارشەممە (20ـی ئاداری 2024) سەرۆك بارزانی لە سەڵاحەددین پێشوازی لە ئەلینا رۆمانۆوسکی، باڵیۆزی ئەمهریكا لە عێراق کرد و لە دیدارێکدا رایگەیاند: پارتی بایكۆتی هەڵبژاردنی نەكردووە بەڵكو لەگەڵ هەڵبژاردنێكی پاك و بێگەرد و شەفافە و دەبێت هەڵبژاردن جێگەی دڵنیایی و دوور لە دەستوەردانی دەرەكی و بەرنامەی پێشوەختە بێت، هەروەها نابێت دەنگدەران لە مافی دەنگدان بێبەش بكرێن و پڕۆسەی دیموكراسی بێ بەها و یاساکانی هەرێم پێشێل بکرێن.
لەبارەی رێککەوتنی لایەنەکانی هاوپەیمانی ئیدارەی دەوڵەت بۆ پێکهێنانی حکومەتی ئێستای عێراق، سەرۆک بارزانی روونیکردەوە: هیچ یەك لە خاڵە گرنگەكانی رێككەوتنی نێوان هەولێر و بەغدا لەگەڵ چوارچێوەی هەماهەنگی جێبەجێنەكراوە و سەقامگیری و خوشگوزەرانی بۆ خەڵک و بنەماكانی شەراكەت، تەوازون و تەوافوق نەهاتوونەتە دی.
لەگەڵ ئەوەشدا، سەرۆک بارزانی جەختیکردەوە لە راوێژ و هەماهەنگیی بەردەوامدا دەبن بۆ چارەسەركردنی كێشەكان و نەهێشتنی نیگەرانییەكان.
التقيتُ برئيس الحزب الديمقراطي الكردستاني مسعود بارزاني للتأكيد على دعمنا لأجراء انتخابات برلمان كردستان العراق لتكون حرة ونزيهة وشفافة وذات مصداقية. يجب أن يكون لجميع مواطني إقليم كردستان العراق صوت في تحديد مستقبلهم. pic.twitter.com/BiatC0Lrti
— Ambassador Alina L. Romanowski (@USAmbIraq) March 20, 2024
رۆژی (18ـی ئاداری 2024) مەکتەبی سیاسیی پارتی دیموکراتی کوردستان بەیاننامەیەکی لەبارەی دۆخی ئێستای عێراق، پەیوەندییەکانی هەولێر و بەغدا، هەڵبژاردنی پەرلەمانی کوردستان، بڕیارەکانی دادگای فیدراڵی بڵاوکردەوە و رایگەیاند: "لایەنەکانی هاوپەیمانی ئیدارەی دەوڵەت دەخەینە بەردەم بەڕپرسیارێتیی نیشتمانی لە جێبەجێنەکردنی دەستوور و سەرجەم خاڵەکانی رێککەوتنی سیاسی و ئیداریی پێکهێنانی کابینەی ئێستای حکومەتی عێراق بە سەرۆکایەتیی محەممەد شیاع سوودانی، بەپێچەوانەشەوە ناتوانین لە پرۆسەی سیاسیدا بەردەوام بین".
سەبارەت بڕیارەکانی دادگای فیدراڵی لەبارەی هەڵبژاردنی پەرلەمانی کوردستانەوە، مەکتەبی سیاسیی پارتی رایگەیاندووە: "بە بەرژەوەندی گەل و نیشتمانەکەمانی دەزانین كە پارتیمان نەچێتە ژێرباری پەسەندکردنی بریاری نادەستووریی و سیستمێکی سەپێندراو لە دەرەوەی ئیرادەی گەلی هەرێمی كوردستان و دامەزراوە دەستوورییەکانی و بەشداری هەڵبژاردنێک نەكات کە بە نایاسایی و نادەستووری و لە سایەی سیستمێکی سەپێندراودا بەڕێوەبچێت".