ئەمەریکا سزای نوێ بە سەر فەیلەقی قودس و چەند ناوەندێکی دیکە دەسەپێنێت
K24 - هەولێر
نووسینگەی چاودێری دارایی بیانیی لە وەزارەتی گەنجینەی ئەمەریکا سزای نوێی بەسەر فەیلەقی قودسی سوپای پاسدارانی ئێران و چەکدارە حووسییەکانی یەمەن و حزبوڵڵای لوبنان سەپاند، هەر لە سزا نوێیەکەی ئەمەریکادا 11 کەس و رێکخراوی پشتیوانیکاری ڕژێمی سووریاش هەن.
بەگوێرەی ڕاگەیەندراوێکی وەزارەتی گەنجینەی ئەمەریکا، شەش دامەزراوە، بازرگانێکی ئاڵوگۆڕی دراو و دوو کەشتی نەوتهەڵگری خستووەتە لیستی گەمارۆکانییەوە، بەهۆی گواستنەوەی کاڵا و پشتیوانییە داراییەکان لە نێوان سوپای پاسداران و حزبوڵڵای لوبنان و چەکدارە حووسییەکان یەمەن.
وەزارەتەکە ئاماژەیداوە، ئەو کۆمپانیا و کەشتییە هەڵگرانەی سزایان بە سەردا سەپێنداروە، لە لیبریا، هیندستان، ڤێتنام، لوبنان و کوەیت تۆمارکراون، هاوکات شەشەمین پاکێجی سەپاندنی سزایە بە سەر سەروەت و سامانی، سەعید جەمالی سەرمایەداری یەمەنییە کە لە ئێران نیشتەجێیە و پشتیوانی دارایی حووسییەکان دەکات.
هەروەها رایگەیاندووە، سەپاندنی سزاکان هەنگاوێکی دیکەیە لەو هەڵمەتەی بۆ لەبەر یەک هەڵوەشاندنەوەی سەرچاوەی دارایی سوپای پاسداران و گرووپە میلیشیاکانی سەر بە ئێرانە.
لە بەشێکی دیکەی راگەیەندراوەکەی وەزارەتی گەنجینەی ئەمەریکا هاتووە، تۆفیق محەمەد سەعید عەلا بازرگانی ئاڵوگۆڕی دراو خەڵکی سووریا و نیشتەجێی لوبنان لە پاکێجە نوێیەکەی سزا دراوانە بەهۆی پشتیوانیی و گواستنەوەی ئەلیکترۆنی دارایی بۆ فەیلەقی قودس و حزبوڵڵای لوبنانی و حووسییەکان.
هەروەها 11 کەس و ناوەندی سەر بە ڕژێمی سووریای بە هۆی بازرگانی ماددەی هۆشبەرەکان سزاداون و ڕایگەیاندووە، سووریا بووەتە ناوەندێکی گەورەی دروستکردن و هەناردەکاری کەپتاگۆن و بۆ تەواوی ڕۆژهەڵاتی ناوەڕاست و ئەوروپا بڵاوی دەکاتەوە.