بارزانی گەیشتە توركیا
K24 – ئەنقەرە
مەسعوود بارزانی سەرۆكی ھەرێمی كوردستان بە سەردانێكی فەرمی گەیشتە ئەنقەرە و لە لایەن بەرپرسانی باڵای توركیا پێشوازی لێكرا.
ماڵپەڕی فەرمی سەرۆكایەتیی ھەرێمی كوردستان رایگەیاند: "ئامانجی سەردانەكە تاوتوێكردنی پەیوەندییە سیاسی و ئابوورییەكانی هەردوولا و دوا گۆڕانكاری و پێشهاتە سیاسییەكانی ناوچەكە دەبێت".
ھەر یەك فوئاد حوسێن سەرۆكی دیوانی سەرۆكایەتی ھەرێمی كوردستان و سەفین دزەیی گوتەبێژی حكوومەتی ھەرێمی كوردستان یاوەری سەرۆك بارزانین لە توركیا.
بە گوێرەی زانیارییەكان، كە بەدەست كوردستان 24 گەیشتوون، لەم سەردانەیدا، مەسعوود بارزانی، سەرۆكی ھەرێمی كوردستان لەگەڵ ھەر یەكە لە رەجەب تەییب ئەردۆغان، سەرۆكی توركیا و بن عەلی یەڵدرم، سەرۆكی وەزیرانی ئەو وڵاتە كۆدەبێتەوە و تاوتوێێی كۆمەڵێك پرس و بابەتی سیاسی ھەنووكەیی ناوچەكە دەكەن. ھەر لە میانی سەردانەكەشیدا، بارزانی لەگەڵ شاندێكی ھەدەپە كۆدەبێتەوە.
چاودێرانی سیاسی پێیانوایە، جگە لە بابەتی تیرۆر و شەری داعش، چاوەڕێ دەكرێت ئاییندەی پەیوەندییەكانی نێوان ھەولێر و ئەنقەرە، دۆزینەوەی دەلیڤەیەكی نوێ بۆ دەستپێكردنەوەی پرۆسەی ئاشتی لە توركیا و پرسی رۆژئاوای كوردستان، تەوەری دیكەی كۆبوونەوە و گفتوگۆكانی نێوان بارزانی و ئەردۆغان و بەرپرسانی توركیا بن.
سەرچاوەكان ئاماژە بەوە دەكەن، رەنگە بارزانی لەو سەردانەیدا لە ئەنقەرە لەگەڵ جۆ بایدن، جێگری سەرۆكی ئەمریكا كۆ ببێتەوە، كە بڕیارە سبەی چوارشەممە، بۆ تاوتوێكردنی دۆسیەی رادەستكردنەوەی فەتحوڵڵا گولەن، سەردانی توركیا بكات.
